филиал вгтрк государственная телерадиовещательная компания “Алания”

13:42 пятница, 29 марта 2024
19 ноября 2020, 13:03
Национ проект «Цæрæнуæттæ æмæ горæты æнцонвадат архайд» царды куыд æххæстгонд цæуы, ууыл ныхас цыд сæрмагонд æмбырды

Амыдта йæ хицауады сæрдар Тускъаты Таймураз

Национ проект «Цæрæнуæттæ æмæ горæты æнцонвадат архайд» царды куыд æххæстгонд цæуы, ууыл ныхас цыд сæрмагонд æмбырды. Амыдта йæ хицауады сæрдар Тускъаты Таймураз. Æмбырд арæзт æрцыд видеоконференцийы хуызы. Профилон министртæ хатдзæгтæ скодтой ацы азы куыстæн, æмæ сæвæрдтой фидæнмæ нысантæ. Цæуыл бантыст бакусын, уый тыххæй радзурдзæн Хæуытаты Зитæ.

Федералон программæтæ бæрæг кæнынц регионы райрæзты комулæфт. Цæгат Ирыстоны æххæст кæнынц цалдæр ахадгæ проекты арæзтады къабазы. Сæ фæрцы рæзы адæмы царды æмвæзад, хуыздæр кæнынц сæ уавæртæ. Куыстыты фылдæр бæрц хауы цæрæнуæттæ æмæ горæты тыгъдады национ проектмæ. Куыд æххæстгонд цæуы, ууыл дзырдтой, Тускъаты Таймуразы разамындæй цы æмбырд ацыдис, уым.

Уымæй уæлдай аразынц цæрæн объекттæ дæр. Республикæйы арæзтад æмæ архитектурæйы министр Тотыккаты Артур куыд радзырдта, афтæмæй ацы аз бацæттæ кодтой цæрæнуæтты дыууæсæдæ æхсай мин квадратон метры. Уыдонæй фæндзай æхсæз мин метры сты хицæн хæдзæрттæ. 2020 азы кæронмæ ма хъуамæ эксплуатацийы радтой цæрæнуæтты нæуæдз дыууæ мин квадратон метры. Фæлæ ивгъуыд азы нысæнттæм ивддзинæдтæ бахаста пандемия.

Уæрæсейы арæзтады министрад республикон ведомствæйымæ бафыста бадзырд, цæмæй радих кæной арæзтадæн субсидитæ. Ацы аз уыцы нысантæн радих кодтой фондзсæдæ милуан сомы. Уыцы фæрæхты фæрцы кæронмæ сарæзтой Дзæуджыхъæуы æстдæсæм микрорайоны фæндаг æмæ скъола фондзсæдæ бынатæн. Ныртæккæ та аразынц, дыууæсæдæ æстай сывæллонæн бынат кæм уыдзæнис, ахæм рæвдауæндон. Ног объект сцæттæ уыдзæнис иннæ аз.

Æмбырды дзырдтой хæрзвадат горæты тыгъдады программæ куыд æххæстгонд цæуы, ууыл. Проект кæдмæ кусдзæн, уæдмæ саив кæндзысты сæдæ фæндзай æхсæнадон бынаты æмæ æхсæзсæдæ æртын дыууæ бирæуæладзыгон хæдзары кæрты. Цы нысантæ æрæвæрдтой ацы райдиан, уыдон сæххæст кодтой уæлдайджынтæй – зæгъы цæрæнуæтты-коммуналон хæдзарады министр Таматы Майрæн. 2020 азы пъланмæ гæсгæ хъуамæ саив кодтаиккой æртын дыууæ æхсæнадон бынаты, фæлæ программæ æххæстгæнджыты сæрæндзинады фæрцы сæ нымæц ссис æртын авд. Афтæ рауадис бирæуæладзыгон хæдзæртты кæртытимæ дæр. Сæдæ дыууын цыппары бæсты базылдысты сæдæ фæндзай дыууæмæ.

Национ проекттæ хуымæтæг адæмы царды уагыл фæзындысты хуыздæрмæ. Уыимæ разы сты республикæйы цæрджытæ. Зæгъæм, Æрыдоны саив кодтой цæрджыты уарзондæр фæлладуадзæн бынæттæ – сквертæ æмæ парктæ. Сывæллæттæн сарæзтой сæрмагонд хъазæн фæз. Æппæт объектты дæр скодтой нырыккон рухсгæнæнтæ. Уæдæ Октябырыхъæуы та фæстаг дыууæ азы дæргъы цæрджыты цинæн сарæзтой æнæхъæн инфраструктурæ.

Бафиппайын хъæуы уый дæр æмæ национ проекттæ æххæст кæнынц æрмæст Дзæуджыхъæуы нæ, фæлæ республикæйы иннæ районты дæр. Уыцы фарстайыл бæлвырд æрлæууыдис Хицауады сæрдар.
Æмбырды рæстæг дзырдтой регионалон проектты райрæзтыл дæр. Цæрынæн чи нал бæззы æмæ заууат уавæры чи ис, уыцы фонды нымæц фæкъаддæр кæныны программæйы архайынц цыппар районы. Уыдон сты Дзæуджыхъæу, Мæздæджы, Рахизфарсы æмæ Дыгуры районтæ.

Æмбырды рæстæг парламентарийтæ æмæ хицауады уæнгтæ баныхас кодтой, цæмæй аивгæнæн куыстыты дизайн проекттæ сфидар кæной æрмæстдæр цæрджыты хъуыдтæ нымайгæйæ. Уымæн æмæ уыцы объекттæ фыццалжыдæр аразынц адæмы удæнцойæн.

vgtrk_alania
vgtrk_alania
vgtrk_alania
vgtrk_alania