«Ацы аз республикæйы быдырты бæркад у зæрдæйы фæндон», – зæгъынц зæхкусджытæ. Стыр æххуыс сын фæцис ног техникæ. Ныртæккæ районты кæронмæ фæхæццæ кæнынц тыллæг æфснайæн куыстытæ.
«Ацы аз республикæйы быдырты бæркад у зæрдæйы фæндон», – зæгъынц зæхкусджытæ. Стыр æххуыс сын фæцис ног техникæ.
Ныртæккæ районты кæронмæ фæхæццæ кæнынц тыллæг æфснайæн куыстытæ.
Зæрдæ райы Дыгуры районы быдырты уындæй. Хорз рæстæг кæй уыд, уымæ гæсгæ хæдзарæдтæ афойнадыл бафснайдтой сæ хор.
Бадриты Маринæ, Дыгуры районы хъæууон
хæдзарады управленийы сæргълæууæг: » Ацы азы хуызæн лæвар нын æрдз рагæй
дæр нал скодта. Фаронимæ абаргæйæ гектарæй исæм дыууæ тоннæйы.
Зæхкусджытæ дæр кæрæдзи хуыздæр æмбарын райдыдтой, стæй сæ куыстмæ дæр
фæарæхсджындæр сты».
Нырыккон техникæйы фæрцы нартхор
æфснайыны куыст цæуы тагъддæр, æнæ къуылымпыйæ. Уымæй уæлдай, ахæм
комбайнты фæрцы хор æфснæйд цæуы æрдæгхусæй, уый та зæхкусæгæн хæссы
æнцойдзинад. Ацы аз куыд Дыгуры районы хæдзарæдтæ, афтæ Æрæфы районы
зæхкусджытæ дæр сæ фæззыгæндтæй сты разы. Нартхор гектарæй исынц 75
процентмæ хæстæг. Зæхкусджытæ куыд зæгъынц, афтæмæй уый у хорз
бæрæггæнæн. Æрæфы районы нартхорæн æфснæйд æрцыд йæ цыппæрæм хай, рæстæг
афтæ куы ахæсса, уæд афойнадыл фæуыдзысты хор æфснайæн куыстытæ.
Зæхкусджытæ æрмæст сæ абоны уавæрыл нæ хъуыды кæнынц, фæлæ ма фидæны сæ
тыллæг бафснайынæн фадæттæ саразыныл дæр.
Сосранты Жаннæ: «Ацы бæстыхай бирæ рæстæг лæууыд æвæгæсæгæй. Ныр пайдайаг кæй суыдзæн, уый гуырысхойаг нæу».
Бæстыхай бацалцæг кæныны хæс йæхимæ
райста зæхкусæг Хадаты Георгий. Кæд зæххы куыст авд азæй фылдæр нæ кæны,
уæддæр ын бирæ хорз хъуыддæгтæ саразын бантыст. Ацы бæстыхайы йæ фæнды
саразын консервгæнæн цех, æхсыры завод, стæй æрвылаз сæ тыллæг кæм
æфснайдзысты, ахæм бынат. Цыбыр рæстæгмæ уал бацæттæ кодтой æппæт
домæнтæн дзуапп чи дæтты, ахæм хордон.
Æгъуызарты Артур: Фермерон хæдзарад
«Хадаев»- ы кусæг: «Нæ хордон цæттæ у. Хусгæнæн аразæм æмæ нæм цыбыр
рæстæгмæ æппæт уавæртæ дæр уыдзæн».
Бадриты Маринæ, Дыгуры районы хъæууон
хæдзарады управленийы сæргълæууæг: «Хæдзарæдтæ фылдæрæй-фылдæр кæнынц.
Зæххы куыст кæнын кæй фæнды, уыдоны нымæц рæзы. Хъыгагæн æппæт адæмæн
баххуыс кæнын нæ бон нæу».
Дыгуры районы хъæууон хæдзарады куыст
бæрзонд æмвæзадыл у. Хицауад зæхкусджытæн аразы æппæт фадæттæ дæр
рæстæджы домæнтимæ æмдзу кæнынæн. Кæм сын техникæ æлхæнынц, кæм та æндæр
хъуыддæгтæй баххуыс кæнынц. Ныртæккæ сæ сæйраг хæс у, зæххытæ бахуым
кæнын æмæ мæнæу фаронæй фылдæр байтауын. Цæмæй ссад нæ республикæйы
фæфылдæр уа, æмæ нæ иннæ республикæтæй æлхæнын ма хъæуа, уый тыххæй.
Сосранты Жаннæ
