Сарæзтой йæ Тускъаты Таймуразы разамындæй видеобастдзинады фæрцы
Нысанон ахуырады бадзырдтæ райсдзысты хуыздæртæ — афтæ загъд уыдис республикæйы сæрмагонд къамисы æмбырды рæстæг. Сарæзтой йæ Тускъаты Таймуразы разамындæй видеобастдзинады фæрцы. Æмбырды рæстæг æркастысты рауагъдонты курдиæттæм нысанон ахуырады тыххæй. Ахæм документ абитуриентæн бар дæтты æнæ конкурсæй йæ равзæрст ахуыргæнæндонмæ бацæуынæн. Сæйраг домæн у иумæйаг паддзахадон фæлварæнæй бæрзонд баллтæ райсын. Ацы аз курдиæттæ нысанон ахуырады бадзырд райсынмæ балæвæрдтой 1690 адæймаджы. Уыдонæй 52 сты Беслæны скъолайы теракты чи бахауд, уыдон.
Ахуырады æмæ наукæйы министр Людмилæ Башаринæ къамисы уæнгтæм бавдыста кандидатты номхыгъд сæ фæлварæнты бæрæггæнæнтимæ. Къамисы хатдзæгмæ гæсгæ, нысанон ахуырады бадзырдтæ бафысдзысты, æппæты фылдæр баллтæ чи æрæмбырд кодта, уыцы рауагъдонтимæ. Льготникты рæнхъы сты Беслæны скъолайы амынæты чи уыдис, уыдон дæр. Рауагъдонтæй бирæты бафæндыд уæлдæр ахуырад Уæрæсейы иннæ регионты райсын. Ацы аз квотæтæ æрбарвыстой Мæскуы, Санкт-Петербург, Ростов, Пятигорск æмæ Старапъолы ахуыргæнæндæттæ. Къамисы уæнгтæ хицæнæй æркастысты, медицинон ахуыргæнæндæттæм нысанон бадзырды фæрцы бацæуын кæй фæнды, уыдоны номхыгъдмæ. Ацы аз Цæгат Ирыстоны медицинон академи уыцы нысантæн радих кодта 75 бынаты педиатрийы дæсныйадæн, 8 бынаты — стоматологийæн, æмæ 80 бынаты — дзæбæхгæнæн факультетмæ. Уымæй уæлдай рауагъдонтæй цалдæрæй ацæудзысты уæрæсейаг медицинон ахуыргæнæндæттæм.
Пироговы номыл мæскуыйаг медицинон университет æмæ Павловы номыл медицинон университет нæ республикæйæн радих кодтой фæйнæ 5 бынаты. Къамис иннæ хатт æрæмбырд уыдзæнис ног къуырийы, иумæйаг паддзахадон фæлварæны бæрæггæнæнтæ æндæр предметтæй куы сбæрæг уой, уæд.
