Æххуысы фæдыл юристтæм бирæтæ æрвитынц курдиаттæ
Пандемийæйы рæстæг адæмы канд се нæниздзинад нæ тыхсын кæны, фæлæ ма куысты бынæттæ куыд бахъахъхъæнæн ис, уый дæр. Æххуысы фæдыл юристтæм бирæтæ æрвитынц курдиаттæ. Хæлд цæуынц фæллойы бадзырдтæ. Зын уавæры сты куыстуæтты разамонджытæ дæр. Фæллойы æмæ социалон рæзты министрад сфидар кодта цалдæр амынддзинады. Уыдонмæ гæсгæ, гæнæн ис кусæджы дæрддзæфы фæллоймæ раивын, уый тыххæй æнæмæнг хъæуы бадзырд сфидар кæнын.
Нæй фæллойгæнæджы æнæ мыздæй арвитын отпускы, уый халы закъон. Фæсарæйнаг бæстæтæй æрбаздæхæг куысджытæн саразын рынчыны гæххæт æмæ цалынмæ йе нæниздзинад сбæлвырд уа, уæдмæ хæдзары куыд уа. Куыстуæтты чи фæллой кæны, уыдонæн та сæ буары тæвд барын. Ацы мæй кæд фæллойгæнæджы æнæбарвæндонæй рацæуын кæной куыстмæ, уæд хæлд цæуынц йæ бартæ æмæ йæ бон у бахъаст кæнын. Афтæмæй куыстдæттæг цæудзæн æфхæрд. Ацы уагæвæрд нæ хауы цардархайдæн ахсджиаг бынæтты кусджытæм.
Æнцон нæ уыдзæн амалхъом адæмæн. Иуæй кусджытæн мызд раттын, иннæмæй та бæстыхайы арендæ бафидын. Уый нæ хауы паддзахадон куыстуæттæм. Фæлæ æндæр адæймаджы исбонæй чи пайда кæны, æмæ ацы уавæртæм гæсгæ йæ бон арендæ бафидын кæмæн нæу, уый хъуамæ ныффысса фыстæг, фиддон фæстæдæр кæй сæхгæндзæн, уый тыххæй. Зæгъæм куыстуат банкротмæ æрцыд, уæд та, гæнæн ис, æмæ сæ бынтондæр ма бафида. Абоны уавæрты уый гæнæн ис.
