Коронавирусы инфекци парахат кæныны рæстæг, алыхуызон мадзæлтты кæй архайдтой æмæ сæ граждайнаг цæстæнгас кæй æвдыстой, уый тыххæй кад кодтой 54 адæймагæн
Сæ профессионалон архайдæн скодтой аккаг аргъ. Пандемияйы рæстæг цы журналисттæ куыстой, уыдонæн раарфæ кодта республикæйы сæргълæууæг Битарты Вячеслав æмæ сын радта арфæйы фыстæджытæ. Коронавирусы инфекци парахат кæныны рæстæг, алыхуызон мадзæлтты кæй архайдтой æмæ сæ граждайнаг цæстæнгас кæй æвдыстой, уый тыххæй кад кодтой 54 адæймагæн. Уыдон сты дыууæ телеканалы минæвæрттæ, газет «Северная Осетия», «Рæстдзинад» æмæ «Слово»-йы кусджытæ. Битарты Вячеслав сын загъта бузныджы ныхæстæ, се нæзæрдæхъудт фæллойы æмæ профессионалон архайды тыххæй.
Хуыздæрты хсæн разындысты Паддзахадон телерадиокомпани «Алани»-йы 14 кусæджы. Уыдонæн дæр иннæ специалисттимæ иумæ радтой арфæйы фыстæджытæ. Нæ телерадиокомпани йæ архайд нæ бауæрдта æппæтæй зындæр эпидемиологон рæстæг. Республикæйы цæрджытæм хæццæ кодтой рынчындæттæй æмæ æндæр ахсджиаг объекттæй æрмæджытæ. Баст уыдысты пандемийæимæ. Æнæрлæугæйæ куыста газет «Рæстдзинад»-ы хистæр уацхæссæг Саутæты Тамилæ дæр. Уымæ гæсгæ йын йæ архайдæн ахæм аргъ кæй скодтой, уымæй у стыр бузныг.
