Культурæйы хæдзары байгоммæ станицæйы цæрджытæ бацæттæ кодтой æрмдæсныйады равдыст, æмæ уазджыты зæрдæтæ барухс кодтой цымыдисаг концертæй
Мæздæджы районы Павлодольскæйы станицæйы бындурон цалцæджы фæстæ йæ дуæрттæ байгом кодта бынæттон культурæйы хæдзар. Кадджын мадзалы архайдтой Цæгат Ирыстоны культурæйы министр Къубалты Эльбрус, Мæздæджы районы æмæ Павлодольскæйы станицæйы разамынд, бынæттон цæрджытæ æмæ сфæлдыстадон коллективты минæвæрттæ. Аргъуаны сæргълæууæг Евгений Колесников, æгъдаумæ гæсгæ, саргъуыдта ног бæстыхайыл. Культурæйы хæдзары байгоммæ станицæйы цæрджытæ бацæттæ кодтой æрмдæсныйады равдыст, æмæ уазджыты зæрдæтæ барухс кодтой цымыдисаг концертæй. Архайдтой дзы адæмон ансамбль «Терцы», сывæллæтты хореографион студи «Сувенир» æмæ Мæздæджы районы культурæйы хæдзары артисттæ. Бæрæгбоны мадзæлттæй дарддæр ма Павлодольскæйы цæрджытæн культурæйы хæдзары кусы библиотекæ, алыхуызон секцитæ æмæ къордтæ. Цæуынц сæм сæдæгай лæппутæ æмæ чызджытæ. Фарон станицæйы кадджынæй сбæрæг кодтой культурæйы хæдзары 60 азы бон. Зæгъæн ис, æмæ уыйбæрц рæстæг бæстыхай цалцæггонд нæ уыд. Уымæ гæсгæ рацарæзты программæ æххæст кæнгæйæ, баивтой бæстыхайы сæр, рудзгуытæ, хъармгæнæн системæ. Уæдæ дзы бакодтой мидæггаг куыстытæ дæр.
