Уый тыххæй Хицауады æмбырды фехъусын кодта æнæниздзинадхъахъхъæнынады министр Годжысаты Тамерлан
Республикæйы консультативон-диагностикон центр куы айсой, уæд уый нæ фæбæрæг уыдзæни, медицинон æххуыс бакæныны лæггæдты хæрзхъæддзинадыл, стæй дохтырты нымæц фæкъаддæр кæныны хъуыддагыл.
Уый тыххæй Хицауады æмбырды фехъусын кодта æнæниздзинадхъахъхъæнынады министр Годжысаты Тамерлан. Йæ ныхæстæм гæсгæ, диагностикон центр лæггад кæны 14 мин адæймагæн. Уый та нормæтæм гæсгæ нæу. Уымæй уæлдай, организаци медицинон æххуыс адæмæн хæдзары нæ кæны, уыимæ, æвæстиаты æххуыс дæр. Уыцы лæггæдтæ æххæст кæнынц æрмæстдæр поликлиникæтæ.
Æмбырды ма ныхас цыди, цæрынæн æнæмæнг хъæугæ хосты æргътыл дæр. Бæрнон кусджытæ сфидар кодтой регламент, æмæ уымæ гæсгæ ацы къабазмæ паддзахадон цæстдард уыдзæни æргом.
