Ацы фарстайыл ныхас цыди æххæстгæнæг хицаудзинады æмæ бынæттон хиуынаффæйады оргæнты разамонджытимæ æмбырды.
Сæбæтхъуаты Æхсарбег бадомдта, цæмæй æнæзакъонæй чи кусы, уыдонимæ тохы районты къамисты уæнгтæ сæ куыст фæкарздæр кæной. Ацы фарстайыл ныхас цыди æххæстгæнæг хицаудзинады æмæ бынæттон хиуынаффæйады оргæнты разамонджытимæ æмбырды. Хицауады сæрдары фыццаг хæдивæг куыд фæнысан кодта, афтæмæй ацы къабазы куыст хъæуы фæхъомысджындæр кæнын. Кæннод, кусгæ чи нæ кæны, уыцы адæмæн æнæмæнг медицинон фæдзæхстады фондмæ фæрæзтæ цæудзысты республикæйы бюджетæй. Æркæсын хъæуы хъæууонхæдзарадон куыстуæттæн гранттæ дæттыны куыст чи кæны, уыцы къамисы архайдмæ дæр. Сæбæтхъуаты Æхсарбеджы ныхæстæм гæсгæ, хъуыддаг æвзарын хъæуы бынаты. Бæлвырддæр та – къамисы уæнгтæ хъуамæ ацæуой, æмæ сæхи цæстæй феной, паддзахадон æххуысмæ чи балæвæрдта, уыцы хæдзарады уавæр. Уымæн æмæ арæх гæххæттыл фыст цы вæййы, уый раст нæ разыны.
