Стыр футболы ирддæр мысинæгтæ. Абон футболуарзджытæ бæрæг кæнынц, 25 азы размæ Дзæуджыхъæуы цы турнир арæзт æрцыд, уый. «Кубок Президента» хаст æрцыд Цæгат Ирыстоны спортивон историмæ.
Уæд нæ республикæмæ ссыдысты Европæйы тыхджындæр командæтæ. Испайнаг «Овьедо», Португалийы «Боавишта» , Италийы «Дженоа». Кæд фембæлдтытæ æмбаладон уыдысты, уæддæр-иу стадионы уæгъд бынæттæ нæ уыд. Дзæуджыхъæуы «Спартак» фембæлд «Овьедо»-имæ, æмæ уыцы хъазт бацыд ирыстойнаг футболы хæзнадонмæ. Уыимæ куыд æппæтæй ирддæр хъазт, афтæ. Фембæлды кæронмæ ма 5 минуты куы хъуыди, уæд турниры фысымтæ хæрд кодтой уазджытæн 1-3 хыгъдæй. Фæлæ хъазты цыд цæхгæр аивта, æмæ Назим Сулейманов 85-æм минутыл бакъуырдта гол, фæстаг минутыл та хыгъд сæмхуызон кодта хъахъхъæнæг Игорь Горелов. Уый фæстæ уыдысты пенальтитæ. Уыдоны арæхстджындæр разындысты ирыстойнаг футболисттæ. Афтæмæй финалы фембæлдысты «Боавишта»-имæ. Уым дæр фæуæлахиз сты не мзæххонтæ. Спортуарзджытæ стадионæй нæ цыдысты цалдæр сахаты дæргъы. «Президенты Кубок» сси æппæтæй ирддæр футболон бæрæгбон.
