Се хсæн ис цымыдисаг æрмæджытæ
Технопарк «Кванториум-15»-ы ныртæккæ хъахъхъæд цæуынц сывæллæтты проекттæ. Се хсæн ис цымыдисаг æрмæджытæ. Зæгъæм, Цæгат Ирыстоны зæрдылдарæн бынæтты тыххæй сæрмагонд сайт, роботтæ-аразджытæ, пластикæй конд æрмæджытæ ногæй бакусынæн кусæнгæрзтæ, æмæ афтæ дарддæр. Проектты хатдзæгтæ мыхуыргонд цæуынц технопарчы сайты диаграммæты хуызы. Уыдоны фæрцы æвдисынц проектты тыхджын æмæ лæмæгъ хъуыддæгтæ. Уый та фадат дæтты дарддæры куысты пълан снысан кæнынæн. Æппæт проекттæ куы бахъахъхъæной, æмæ педагогты амынддзинæдтæ куы бахынцой, уæд сараздзысты ахуыргæнинæгты хыгъдтæ ног ахуырадон модульмæ. Уый райдайдзæн 1-æм февралы. Хорз бæрæггæнæнтæ чи равдиса, уыцы ахуырдзауты раивдзысты зындæр программæмæ. Куы сæ бафæнда, уæд та сæхи раивдзысты æндæр къабазмæ. Уæдæ хорз куысты хатдзæгтæ кæмæн нæ бантысти равдисын, уыдонæн та фадат уыдзæн дыккаг хатт ивгъуыд модуль ацæуынæн. Уæ зæрдыл уын æрлæууын кæндзыстæм, «Кванториум-15» у, Цæгат Ирыстоны сывæллæттæн цы дыууæ технопарчы сарæзтой, уыдонæй иу. Куыстытæ æххæстгонд цыдысты национ проект «Ахуырад»-мæ гæсгæ.
