Цæгат Ирыстоны уыд мотоциклистты æмбырд. Дзæуджыхъæумæ ссыдысты Польшæйæ, Украинæйæ, Белоруссийæ, Молдавийæ, Казахстанæй æмæ Уæрæсейæ. Æдæппæтæй 150 адæймаджы.
Се ‘ппæт дæр сты мотоцикл БМВ-йы хицæуттæ. Нæ горæты сын арæзт æрцыд 1-аг æппæтдунейон æмбырд. Театралон фæзы сын ирон æгъдаумæ гæсгæ 3 чъириимæ æгасцæуай загъта нæ республикæйы сæргълæууæг Мамсыраты Таймураз. Раарфæ сын кодта, ахæм ахсджиаг хъуыддаг саразынмæ нæ республикæ кæй равзæрстой, уый тыххæй. Мотоциклисттæ куыд бамбарын кодтой, афтæмæй Цæгат Ирыстон равзæрстой, цæмæй адæмæн равдисой, ам, куыд дзурынц, афтæ тæссаг кæй нæу, уый, стæй сæ бирæтæ рагæй бæллыдысты нæ хæхтæ фенынмæ. Фæстæдæр Мамсыраты Таймураз æмæ байкертæ сæ къухтæ бафыстой, олимпаг хъæзтытæй уæгъдибар хъæбысхæст айсыныл разы кæй не сты, уый тыххæй. Слеты архайджытæ нæ республикæйы фесты 3 боны, базонгæ сты нæ культурæ æмæ æгъдæуттимæ, бабæрæг кодтой Ирыстоны рæсугъддæр кæмттæй иу, Цъæй.
