Республикæйы йæ тæмæны ис æфсадмæ сидыны кампани.
Цæгат Ирыстонæй 700 лæппуйæ фылдæр æрлæудзысты æфсады рæнхъыты. Республикæйы йæ тæмæны ис æфсадмæ сидыны кампани. Службæ кæнынмæ ацæуыны размæ уал фæсивæд фæархайынц цæттæ кæныны цалдæр къæпхæны. Традицион медицинон æркастæй уæлдай æнæмæнгæй раттынц тест, коронавирусæй рынчын сты, æви нæ, уый тыххæй.
Æфсадмæ сидыны фæззыгон кампани ацы аз цæуы сæрмагонд фæткмæ гæсгæ. Фылдæр æргом дзы здахынц æнæниздзинадмæ. Ацы хъуыддаг уæлдай ахсджиаг у, ныртæккæ та коронавирус ногæй кæй апарахат, уый тыххæй. Республикæйы æфсæддон комиссарады æмбырдгæнæн пункты республикæйы æппæт районтæй сиддонтæн барынц сæ тæвд, дезинфекци сын кæнынц сæ къухтæ, æмæ сæ уый фæстæ арвитынц сæрмагонд бынатмæ. Уым сын скæнынц анализтæ, æмæ сæ искæмæ инфекци куы разына, уæд æй уайтагъд арвитдзысты изолятормæ. Ковид кæмæ нæ разына, уыдонæн та дарддæр кæнынц медицинон æркаст. Æмæ сæ цалынмæ нæ арвитынц, уæдмæ вæййынц æфсæддон комиссарады. Ацы аз Цæгат Ирыстонæй æфсады службæ кæнынмæ ацы аз ацæудзысты 7 сæдæ лæппуйæ фылдæр. Се хсæн Хъуылаты Умар. Лæппуйæн æфсад у, йæ бæллиц сæххæст кæнынмæ фыццаг къæпхæн. Фидæны йæ фæнды æфсæддон суæвын æмæ фистæгæфсæддон æфсады службæ кæнын.
Фыццаг бон тестытæ æмæ медицинон æркаст ацыдысты 60 адæймаджы. 15-æм октябры ацы фæсивæд араст уыдзысты æфсæнвæндаджы вокзалмæ, уырдыгæй сæ аласдзысты нæ бæстæйы алы зылдты æфсæддон хæйттæм.
Æфсадмæ сидыны кампани ахæсдзæни декабрьмæ.