Фыццаг привикæйæ 21 бон куы рацæуа, уæд та райдайдзæн дыккаг къæпхæн
Цæгат Ирыстонмæ æрбацыд ковиды ныхмæ вакцинæ «Спутник V»-йы ног парти. Медицинон кусджытæй фæстæмæ прививкæтæ кæнынц, 18 азæй уæлæмæ кæуыл цæуы, æмæ йе нæниздзинадмæ гæсгæ йæ кæмæн ис скæнæн, уыдонæн се ппæтæн дæр, æцæг барвæндонæй. Вакцинæйы фыццаг къæпхæн нæ республикæйы райдыдта ноябры, уæд сæ скодтой дохтыртæн. Æдæппæтæй нæ республикæйы короновирусы ныхмæ привикæтæ скодтой 137 адæймагæн, уыдонæй 87 скодтой Дзæуджыхъæуы 1-æм поликлиникæйы, 30 – 4-æмы, 20 адæймаджы та 7-æм поликлиникæйы. Вакцинæ скæнынæн бынæттон дохтырæй хъæуы райсын сæрмагонд гæххæт. Уый хъуамæ сбæрæг кæна адæймаджы æнæниздзинад, стæй йæ цæст дары, дарддæр йæхи куыд æнкъары, уымæ.
Прививкæтæ нæй кæнæн æндæр вакцинæтæм аллергия кæмæ ис, æнæздзæбæхгæнæн низæй рынчын чи у, риуылхæсгæ сывæллон кæмæн ис, стæй 18 азы кæуыл нæма сæххæст, уыдонæн дæр.
Фыццаг привикæйæ 21 бон куы рацæуа, уæд та райдайдзæн дыккаг къæпхæн. Нæ республикæйы уый уыдзæн райсом. Хæстæгдæр рæстæг та ма ноджыдæр райсдзыстæм 100 вакцинæйы.
Дохтыртæ зæгъынц, прививкæ кæй нæ бахъыгдардзæн ацæргæ адæймаджы дæр.
