Программæ «Цæгат Ирыстоны æнæниздзинадхъахъхъæнынады рæзт» æххæст кæнгæйæ та Горæтгæрон районы алы хъæуы дæр фидæны хъуамæ уа йæхи медицинон куыстуат
Цæгат Ирыстоны 2021-æм азмæ хъуамæ арæзт æмæ цалцæггонд æрцæуой 36 фельдшерон-акушерон пункты æмæ амбулаторийы. Программæ «Цæгат Ирыстоны æнæниздзинадхъахъхъæнынады рæзт» æххæст кæнгæйæ та Горæтгæрон районы алы хъæуы дæр фидæны хъуамæ уа йæхи медицинон куыстуат
Боныгон стационары бæстыхай цæттæ у пациентты исынмæ. Фæлæ пандемияйы рæстæг нæма сты, кæд æмæ амбулатори кусы мартъийы райдиан, уæддæр. Специалисттæ кæнынц æмбæлгæ медицинон æххуыс. Ам уый тыххæй ис алцы дæр. Суанг хи хъахъхъæнæн костюмтæ дæр.
Ацы куыстуат сарæзтой 8 мæймæ. Бирæ рæстæг амбулатори куыста æндæр бæстыхайы. Фæлæ, зæгъæн ис, æмæ дохтыртæн сæхи хæдзар нæ уыди. Ам лæггад кæнынц канд Майскæйы цæрджытæн нæ, фæлæ ма поселок Северныйы адæмæн дæр. Фæллой кæнынц 17 кусæджы, уыдонæй 5 сты дохтыртæ. Педиатрты кабинеты дохтыртæ ивынц кæрæдзийы. Медиктæ ног амбулаторийы уавæртæ хорзыл банымадтой.
Æдæппæтæймедицинон куыстуат лæггад кæны 7 мин адæймагæй фылдæрæн. Уыдонæн сæ рæстæмбис сты сывæллæттæ. Амбулатори байгом кæнынмæ æнхъæлмæ кастысты куыд бынæттон цæрджытæ, афтæ дохтыртæ сæхæдæг дæр.
Дæллаг Санибайы та фельдшерон-акушерон пункт нысан кæнынц хæстæгдæр рæстæг байгом кæнын. Аразын æй райдыдтой ивгъуыд аз декабры. 220 квадратон метры фæзуат ныртæккæ цæттæ кæны фыццаг пациенттæн балæггад кæнынмæ. Раздæр медицинон кусджытæ фæллой кодтой бынæттон администрацийы бæстыхайы, ныртæккæ та сын ис сæхи территори. Медицинон кабинеттæй дарддæр ма дзы ис цæрынæн бæстыхай дæр. Æмбалаты Алинæ у терапевт. Санибамæ æрбацæуы Дзæуджыхъæуæй. Лæггад кæны 2000 адæймагæн.
Фæстаг дыууæ азмæ Горæтгæрон районы активонæй аразынц медицинон куыстуæттæ. Байгом сты фельдшерон-акушерон пункттæ æмæ амбулаторитæ. Ныры онг кæронмæ æрхæццæ Архонкæйы рынчындоны рацарæзт. Уый бантыст, республикæйы национ проекттæ æххæст кæныны фæрцы.
Зæгъæн ис, æмæ районы æххæстæй лыггонд æрцыд кадрты фарста дæр. Ууыл хорзырдæм сахадыдта программæ «Земский доктор». Стыр æргом ма аздахын хъæуы районы поликлиникæйы уавæрмæ. Хъуамæ иу бонмæ лæггад кæна 600 адæймагæн. Бæстыхай хъæуы рацаразын. Ныртæккæ хъуыддагыл куыст цæуы. Фидæны хъуамæ Горæтæгæрон районы алы хъæуы дæр уа медицинон куыстуат.
Республикæйы та 2021-æм азмæ хъуамæ арæзт æмæ цалцæггонд æрцæуой 36 фельдшерон-акушерон пункты æмæ амбулаторийы. Уымæн æмхæццæ бюджетæй радих кодтой 220 милуан сомы. Программæ «Цæгат Ирыстоны æнæниздзинадхъахъхъæнынады рæзт» арæзт у 2024-æм азмæ. Уый æххæст кæнгæйæ фæрæзтæ дæр кæндзысты фылдæр.
