филиал вгтрк государственная телерадиовещательная компания “Алания”

13:54 пятница, 29 марта 2024
10 июня 2020, 16:58
Цæгат Ирыстоны 6 ахуыргæнæджы систы Уæрæсейы президенты премийы аккаг

Се ппæтæн дæр ахуыргæнæнджы дæсныйад у зæрдæйы домæн

Цæгат Ирыстоны 6 ахуыргæнæджы систы Уæрæсейы президенты премийы аккаг. Се ппæтæн дæр ахуыргæнæнджы дæсныйад у зæрдæйы домæн. Уымæн æвдисæн – алы педагог дæр йæхи ахуырадон метоикæйыл кæй бакуыста, уый.

Йæ уарзон ахуырдзауты хуызистытæ сты компьютеры. Дардмæ ахуырады æмгъуыдмæ сыл Кобылты Зæлинæ тынг сæнкъарди, сæ къухтæ-иу куыд систой, æмæ-иу дзуæппытæ куыд лæвæрдтой, ууыл. Архонкæйы дыккæгæм скъолайы кусы фæстаг 10 азы. Предмет дæттæг педагог, къласы разамонæг, æцæг профессионал. Ныр та ма ацы миниуджытæм бафтыдта лауреаты ном. Йæ уæгъд рæстæг англисаг æвзаджы ахуыргæнæг арвыста, президенты преми райсыны конкурсмæ цæттæ кæнгæйæ.

Ацы скъолайæн президенты преми райсыны конкурсы архайын сси хорз традици. Зæгъæн ис, æмæ дзы алы аз дæр рамбулынц. Олеся Маслова та у Камбилеевскæйы скъолайы иунæг минæвар. Кæд ын фæлладуадзæн рæстæг у, уæддæр райдиан кълæсты ахуыргæнæг фæнд кæны йæ куыстытæ кæронмæ ахæццæ кæнын. Разæй та йæм æнхъæлмæ кæсы ног ахуыры азмæ цæттæгæнæн куыст. Конкурсы хатдзæгтыл нал мæт кæны. Уымæн æмæ йын ахуыргæнæг суæвын у йæ сабибонты бæллиц. Уарзон дæсныйады ис ныр 15 азы. Ацы аз ерыс кодта нæ республикæйы хуыздæр педагогтимæ. Цалдæр боны размæ та базыдта, иннæ конкурсы кæй фæуæлахиз, уый.

Дыууæ педагогы дæр сæхицæн сбæлвырд кодтой, сæ преми цæуыл схардз кæндзысты, уый. Кобылты Зæринæ фæнд кæны фæрæзтæ йæхи ахуырадыл схардз кæнын, Олеся Маслова та сæ бахæсдзæн бинонты бюджетмæ. Уæвгæ ацы аз Цæгат Ирыстоны президенты премийы хицæуттæ систы 6 педагогы. Пандемияйы аххосæй арæзт уыд иу къæпхæнæй, дыууæйы бæсты. Архайджытæн аргъ кодтой конкурсон къамисы уæнгтæ. Уæлахиздзаутæ сбæрæг сты баллтæм гæсгæ.

Ацы аз конкурсы архайдтой 9 адæймаджы. Йæ аххосаг – нæ регионы эпидемиологон уавæр. Зæгъæм, фарон конкурсантты нымæц уыд 17 адæймаджы. Сæ зонадон тыхтæ бафæлварыны фадат ис алы педагогæн дæр. Сæйрагдæр у – æвзарæн домæнтæн дзуапп дæттын, стæй сæхи ахуырадон методикæйыл бакусын. Афтæ зæгъынц профилон ведомствойы. Уый та стыр ахъаз фæуыдзæн ахуырадон процессы хæрзхъæддзинад фæхуыздæр кæнынæн.

vgtrk_alania
vgtrk_alania
vgtrk_alania
vgtrk_alania