Архайынц дзы æфсæддон къордты хуыздæр медицинон специалисттæ
«Æфсæддон-медицинон эстафетæ-2021». 58-æм æфсады мысанæхсæн дивизийы æмæ æфсæддон пъæлицæйы ахуырадон центры бындурыл арæзт æрцыди спорты цалдæр хуызæй хи фæлварыны æппæтæфсæддон къæпхæн. Конкурс ацæудзæн дыууæ къæпхæнæй. «Сæрмагонд дæсныйад» æмæ «Командон ерыстæ». Архайынц дзы æфсæддон къордты хуыздæр медицинон специалисттæ. Ныридæгæн схæццæ сты республикæмæ. Къуырийы æмгъуыдмæ ерыс кæндзысты мысанæхсынæй, стæй цæлхдурты сæрты хизынæй. Командæты уæнгтæ равдисдзысты сæ арæхстдзинад быдираг уавæрты архайынæй.
Конкурсы ирддæр къæпхæнтæй иу суыдзысты «Командон ерыстæ». Сæрмагонд æрмæгæй ифтонггонд бынаты кæстæр медицинон кусджыты æмæ шофырты хъæуы æппæт хæслæвæрдтæ дæр цыбыр æмгъуыдмæ сæххæст кæнын. Конкурсы хатдзæгтæм гæсгæ, равзардзысты бæстæйы хуыздæр æфсæддон медицинон кусджыты. Уыдон хаст æрцæудзысты УФ-йы æфсæддон тыхты иугонд командæйы хыгъдмæ, æмæ архайдзысты 2021-æм азы Æфсады æппæтадæмон хъæзтыты.
