Иумæйаг фæрæзты фонд фæфылдæр кодтой, фæлæ алы ахуыргæнæджы мыздыл нæ фæбæрæг уыдзæн
Цæгат Ирыстоны ивд æрцыд ахуыргæнджытæн куысты мызд фидыны системæ. Иумæйаг фæрæзты фонд фæфылдæр кодтой, фæлæ алы ахуыргæнæджы мыздыл нæ фæбæрæг уыдзæн. Цавæр домæнтæм гæсгæ бафтаудзысты фиддонтæ, æмæ цы у ног системæ, уый тыххæй радзурдзæн Моргуаты Ладæ.
Æрыгон ахуыргæнджыты мызды бындурон хайыл кæй бафтыд, уый фæрцы Къостайыхъæуы скъолайы историйы ахуыргæнæг Кучиты Сосланæны мыздыл бафтыд 2 мины.
Уæлдæр къæпхæны ахуыргнæджыты бындурон мызд фæфылдæр кодтой 5 мины. Уый бæрц фылдæр райста Дзæуджыхъæуы 42-æм скъолайы ахуыргæнæг Дудараты Фатимæ.
Мызд фидыны ног системæ арæзт æрцыд, цæмæй ахуыргæнджыты тырныдзинад зонындзинæдтæ дæттынмæ кæна хуыздæр.
Ног домæнтæй иу у, цæмæй ахуыргæнæджы мызд уа бæрæг, цæмæй ахуыргæнджытæ æмбарой, куыд æмæ сын цæй тыххæй фидынц. Номдзыд ахуыргæнджытæн та сæ уæлæмхасæн ивд не рцыд.
Ног системæ иу æмвæзадыл æвæры æрыгон æмæ фæлтæрдджын ахуыргæнджыты. Фæлæ се ппæт ахæм ивддзинæдтæм цæттæ не сты. Уымæ гæсгæ цæгатирыстойнаг ахуыргæнджытæ ныффыстой нæ бæстæйы Президент Владимир Путины онлайны фæзмæ. Æмæ дзы загътой, ног системæмæ гæсгæ ист кæй æрцыдысты хицæн уæлæмхасæн фиддонтæ æмæ сæ курдиат у, цæмæй сын сæ фæстæмæ раздахой.
Ацы фасртайы фæдыл ахуыргæнджыты профцæдистæм дæр цæуы бирæ курдиæттæ, уыдонæй иу у райдиан кълæсты ахуыргæнæг, стæй йæхæдæг дæр профцæдисы минæвар Элеонора Вартанян. Скъолайы кусы 30 азæй фылдæр. Сæйраг фарста у педагогтимæ кæй нæ кæнынц æмбарынгæнæн куыст.
Адæмон ахуырад æмæ наукæйы профцæдисты сæрдары хъуыдымæ гæсгæ ног системæйæ разыйæ баззайдзысты, бирæ сывæллæттæ кæм ис , уыцы хъæууон скъолаты ахуыргæнджытæ.
Ахуырад æмæ наукæйы министрады зæгъынц, ног системæйы фарстатæй иу кæй у æрыгон ахуыргæнджыты кад, уыимæ та зонындзинæдты æмвæзад бæрзонддæр кæнын.
