Равæрдтой дзы хойраджы продукттæ, алыхуызон дæттæ æмæ хомаг
Цæгат Ирыстоны куыстуæттæ архайынц 27-æм æппæтадæмон равдыст «ПродЭкспо-2020»-ы Мæскуыйы. Равæрдтой дзы хойраджы продукттæ, алыхуызон дæттæ æмæ хомаг. Уæрæсейы æмæ Скæсæйнаг Европйы егъаудæр форумы нæ республикæ йæхи фыццаг хатт равдыста афтæ парахатæй. Коллективы иумæйаг стенды фенæн ис 20 компанийы продукци. Уымæй дарддæр дзы равæрдтой хицæн стенд дæр. Уым та фенæн ис æнæххæстбарджын æхсæнад «Вершина»-йы кæй ныссæлын кæнынц, ахæм ирон чъиритæ. Стыр æргом аздæхтой цæхдон «Соус нартов»-мæ. Стендты раз ацаходæн ис минералон дæттæй, стæй ма æрдзон косметикæ бафæлварын дæр. Равдыст «ПродЭкспо-2020» бирæ фадæттæ дæтты æмгуыстадæн æмæ куыстуæтты, базарадон хызты, ресторанты æмæ кафеты фидæны рæзтæн. Ацы аз Мæскуыйы равдысты архайынц 2 мины 600 компанийæ фылдæр дунейы 70 бæстæйæ. Равдыст йæ куыст фæуыдзæн 14-æм февралы.