20 азы фæстæ кафедрæ ногæй байгом нæ республикæйы.
Цæгат Ирыстоны паддзахадон университеты æфсæддон кафедрæйы ахуыр кæнынмæ курдиæттæ балæвæрдтой 150 студенты. 20 азы фæстæ кафедрæ ногæй байгом нæ республикæйы. Æфсæддон комиссарады медицинон къамисы æркаст чи ацыди, уыцы лæппутæ æрæмбырд сты университеты спорты галуаны цур, цæмæй радтой спортивон цæттæдзинады нормативтæ. Фæсивæды хъуыди физкультурæйы алыхуызон фæлтæрæнтæ сæххæст кæнын. Ацы къæпхæны студентты равзардзысты, æмæ сбæрæг кæндзысты, чи сержантыл ахуыр кæндзæн, чи та хуымæтæг салдатыл. Лæппутæ ахуыр кæндзысты, сæйраг ахуырадон процессæй уæгъд рæстæг. Базондзысты рæнхъытæй раст цæуын, хæцæнгарзимæ архайыны тактикæ æмæ стратеги, фыццаг медицинон æххуыс кæнын, хи хъахъхъæнын, стæй æфсæддон дæсныйады æндæр сусæгдзинæдтæ. Æфсæддон æвдисæндар студенттæ райсдзысты, уæлдæр ахуырады дипломимæ иумæ.