Йæ архайджытæ систы Къостайы номыл æмæ аграрон паддзахадон университетты алы факультетты студенттæ.
Хетæгкаты Къостайы райгуырды 160 азмæ Цæгат Ирыстоны паддзахадон университеты историон факультеты хъæппæрисæй арæзт æрцыд цымыдисаг квест #Коста160. Йæ архайджытæ систы Къостайы номыл æмæ аграрон паддзахадон университетты алы факультетты студенттæ. Алы командæйы дæр фæйнæ 7 адæймаджы. Се ппæтæн дæр ацы бон сси ахсджиаг æмæ дисыфтауæг. Уымæн æмæ хуыздæр æмæ арфдæр базыдтой ирон литератруæйы бындурæвæрæг, зындгонд рухстауæг æмæ мæгуыр адæмы бартыл тохгæнæг Хетæгкаты Къостайы цард æмæ сфæлдыстад.
Квесты архайынæн бахъуыд Къостайы цард æмæ сфæлдыстады тыххæй бæлвырд зонындзинæдтæ равдисын. 8 бынаты ерысты архайджытæ æмбæлыдысты Анна Поповайы, Цæлыккаты Алыксандры æмæ Æмбалты Цоцко æмæ æндæртимæ баст мысинæгтимæ.
Квесты хæслæвæрдтæ разындысты цымыдисаг, фæлæ æнæнхъæлæджы. Зæгъæм, Къоста кæй уарзта уыцы чызг Анна Поповайы хæдзары цур студентты хъуыди гæххæттыл писмо-æмдзæвгæ ныффыссын. Уый фæстæ йæ балкъонмæ баппарын, ома кæддæр-иу Аннæ кæдæм рацыд, уырдæм.Цымыдисаг квесты уæлахиздзау сси хæххон паддзахадон аграрон университеты командæ. Рамбылдтой ахсджиаг хæрзиуæг. Фадат сын уыд Ирыстоны историон бынæттæм абалц кæнын. Лæппутæ æмæ чызджытæ базыдтой бирæ ног хабæрттæ. Квесты архайгæйæ та ма сæм фæзынд фылдæр тырнындзинад Хетæгкаты Къостайы сфæлдыстад хуыздæр æмæ арфдæр базонынмæ.
