Баст у «Социалон-экономикон æмæ æрдзон – техногенон системæты комплексон æдасдзинадимæ»
Цæгат Кавказы хæххон металлургон институты ректор Цæгат Кавказы наукон -ахуырадон центры минæвæрттимæ Сколковы радта йæ проект. Баст у «Социалон-экономикон æмæ æрдзон – техногенон системæты комплексон æдасдзинадимæ». Ахæм центртæ саразыны хъæппæрисы тыххæй фарон майы фехъусын кодта нæ бæстæйы президент Владимир Путин. Ацы хъуыды йæм æрцыд, Уæрæсейы Федерацийы райрæзты стратегион нысантæ аразгæйæ. Национ проект «Наукæ»-мæ гæсгæ саразын хъæуы, дунейы æмвæзадыл чи уыдзæн, ахæм 15 наукон-ахуырадон центры. Программæйы фæтк саразын æмæ йæ равдисын уыд сæрмагонд фæзуат «Остров 10-22». Цæгат Кавказы хæххон-металлургон институт дзы арахйы активонæй, уымæй уæлдай ма йæм бацыдысты нæ республикæйы æндæр уæлдæр ахуыргæнæндæттæ. Дзæуджыхъæуы Юрий Дмитрак радзырдта, фембæлды рæстæг йæ архайджытæ кæй æрдзырдтой наукон-ахуырадон центр саразыны мадзæлттыл, уыимæ финансон æмæ барадон фарстатæ хынцгæйæ, радзырдтой сæхи уынынады тыххæй дæр. Центр саразыны нысантæй иу у кадртæ цæттæ кæнын æмæ сын уавæртæ аразын, цæмæй регионы дарддæр дæр кусой. Ректор куыд бафиппайдта, афтæмæй ерыс кæндзысты тыхджындæртимæ. Йæ архайджытæ хъахъхъæнынц сæ регионты кад. Проектты хæрзхъæддзинад цы къамис æвзары, уый сæргъы та лæууы Уæрæсейы ахуырад æмæ наукæйы министр Михаил Котюков.
