Хæстон офицер Айнди Исаев пенсийы куы рацыди, уæд йæ рæстæг снывонд кодта диктор Юрий Левитаны биографи иртасынæн.
Цæцæны республикæйæ уазæг бабæрæг кодтаМæздæджы районыветеранты Совет. Хæстон офицер Айнди Исаев пенсийы куы рацыди, уæд йæ рæстæг снывонд кодта диктор Юрий Левитаны биографи иртасынæн. Фыдыбæстæйы Стыр хæсты рæстæг Юрий Левитан касти, ома, адæмæн хъусын кодта Сæйраг командæгæнæг – Сталины уагæвæрдтæ. Айнди Исаев бахаста Мæздæджы скъолаты лæгдзинады уроктæ кæныны фæндон. Ахуырты рæстæг рæзгæ фæлтæрæн дзурдзысты, зындгонд Юрий Левитаны тыххæй, йæ текстытæ йын зын уавæрты куыд цæттæ кодтой, уый. Уыимæ йын Цæцæны республикæйы минæвар зонгæ у, йæ фырты фырт Артур Левитанимæ. Уый дæр кусы мыртæ фыссæн студийы, æмæ, зæгъæн ис, дарддæр хæццæ кæны йæ фыды-фыды хъуыддаг. Советон дикторы цард æмæ куыстыты тыххæй лекцитæ хорз уæлæмхасæн фæрæз уыдзысты сывæллæтты патриотон хъомылады, загъта, районы ветеранты советы сæрдар Юрий Соколов, æмæ сыхаг регионæй уазæджы æрбахуыдта æмгуыстад кæнынмæ. Цымыдисаг уый у, æмæ Айнди Исаевæн дæр йæ бон у зындгонд дикторы текстытæй рæнхъытæ бакæсын, уыимæ та Юрий Левитаны йæхи хъæлæсы уагæй.
