Равдыст арæзт æрцыд Скæсæйнаг аивады зындгонд эксперт, нывгæнæг Григорий Акимченкойы хи куыстытæй
Тугъанты Махарбеджы номыл аивадон музейы байгом цымыдисаг экспозици «Япойнаг аивад. Нывкæнынад, каллиграфи, гравюрæ». Равдыст арæзт æрцыд Скæсæйнаг аивады зындгонд эксперт, нывгæнæг Григорий Акимченкойы хи куыстытæй. Сæ фылдæр баст сты Тогукаваæйы династийы азтимæ 17-æм æнусæй 19-æм æнусы астæумæ.
Фæлæ дзы фенæн ис 20 æнусы уацмыстæ дæр. Конд сты традицион стилы. Музейы залты фенæн ис монохромы æмæ полихромы нывкæнынады дæнцæгтæ, алыхуызон стильты конд каллиграммæтæ. Уæдæ дисы фтауынц зындгонд япойнаг гравюрæйы куыстытæ. Уæлдай ирддæр сты Андо Хиросигэ, Утагава Кунимаса æмæ Утагава Куниесийы гравюрæтæ. Скæсæйнаг аивады равдыст фенæн уыдзæн сентябры астæумæ.
Григорий Акимченкойы экспозицимæ уæлæмхасæн хуызы та ма ацы бонты цæттæ кæнынц Китайы æмæ Японийы æрмдæсныйады куыстыты равдыст байгом кæнын дæр. Экспонаттæ уыдзысты Тугъанты Махарбеджы номыл музейы хи фондтæй ист.
