Бабæрæг ма кодта Горæтгæрон, Кировы, Æрæфы æмæ Алагиры районы социалон объектты арæзтад æмæ цалцæг
Тускъаты Таймуразы радон кусæг балц абон райдыдта Дзæуджыхъæуæй. Бабæрæг ма кодта Горæтгæрон, Кировы, Æрæфы æмæ Алагиры районы социалон объектты арæзтад æмæ цалцæг. Хицауады сæрдар уал, фыццаджыдæр, йе ргом аздæхта Национ музейы куыстытæм. Дзæуджыхъæуы администрацийы сæргълæууæг Фæрниаты Тамерланимæ федтой, фондтæ кæм хъахъхъæндзысты, уыцы корпусты рацарæзт. Нысан дзы кæнынц 300 мин экспонаты дарын. Кæрты территори иу кæны Хетæгкаты Къостайы номыл культурæйы æмæ фæлладуадзæн парк. Ныртæккæ дзы кусынц, цæмæй йæ архитектурон хуыз ивд ма рцæуа, ууыл. Премьер ма бабæрæг кодта 18-æм микрорайоны иумæйагахуырадон скъолайы арæзтад. Уыдзæн дзы 500 бынаты. Куыстытæ, зæгъæн ис, æмæ кæронмæ фæхæццæ кæнынц. Специалисттæн бантыст 3 уæладзыджы самайын. Баззади ма сын спортивон фæз саразын. Кæронмæ фæхæццæ кæнын 19-æм микрорайоны скъолайы арæзтад дæр. Ис Владикавказскийы уынджы. Бæстыхайы бынат уыдзæн 1100 адæймагæн. Арæзт цæуы тæккæ нырыккондæр технологитæм гæсгæ. Цымыдисаг уыдзæн йæ хуызæй. Тускъаты Таймураз федта фельдшерон-акушерон пункты арæзтад Дæллаг Санибайы æмæ амбулатори Михайловскæйы. Куыстытæ райдыдтой ноябры, æмæ цæуынц тагъд, загъта премьер. Рахизфарсы районы та хицауады сæрдар федта, рæвдауæндæттæм цы уæлæмхасæн арæзтæдтæ кæнынц, уыдон. Дыууæ объекты дæр, зæгъæн ис, æмæ куыстытæ фæвæййынц.
