Нæ республикæйы та спортивон бæрæгбон фенæн уыд Терчы былгæрон
Уæрæсейы 80-йæм хатт сбæрæг кодтой физкультурничы бон. Нæ республикæйы та спортивон бæрæгбон фенæн уыд Терчы былгæрон. Йæ архайджытæ скодтой чемпионимæ фæлтæрæнтæ, архайдтой ерысты волейболæй, бадминтонæй, мини-футболæй, шахмæттæй æмæ «Хъæлдзæг старттæй». Спортивон мадзал арæзт æрцыд республикæйы физкультурæ æмæ спорты министрады хъæппæрисæй. Уæлахиздзаутæ хорзæхгонд æрцыдысты кубоктæй, майдантæй æмæ зæрдылдарæн лæвæрттæй. Бæлвырддæр хабæрттæ радзурдзæн Касаты Наирæ.
Ивгъуыд сабаты республикæ традицимæ гæсгæ сбæрæг кодта хъæлдзæг бæрæгбæттæй иу – физкультурничы бон. Ацы аз ыл сæххæст 80 азы. Бæрæгбоны мадзæлттæ цыдысты Терчы былгæрон фæлладуадзæн зонæйы. Прогрмаммæ байгом ис республикæйы физкультурæ æмæ спорты министры хæдивæг Гульчеты Валерийы раныхасæй. Арфæ ракодта се ппæтæн дæр, æмæ сын йæ зæрдæ загъта фыццаджыдæр æнæнизцардыуагмæ æмхиц уæвын.
Спортивон хай та райдыдта чемпионтимæ зарядкæйæ. Архайдтой дзы Олимпаг чемпион Рæмнаты Сослан æмæ дунейы чемпион Цæболты Хетæг. Бæрæгбоны архайджытæн скодтой дæсныйадæвдисæг ахуыртæ.
Цымыдисаг мадзæлттæ цыди спортивон фæзты дæр. Волейболæй, футболæй, баскетболæй, стритболæй æмæ бадминтонæй турнирты уыди бирæ архайджытæ. Фæсивæды хъуыдымæ гæсгæ, ахæм мадзæлттæ сты ахсджиаг, æмæ афæдзæй-афæдзмæ сæ ахадындзинад ноджыдæр рæзы.
Физкультурничы бон рауади хъæлдзæг æмæ пайдайаг. Гæнæн ис, æмæ искæмæн та сси спорты бæрзæндтæм фæндаг.
