Ведомствойы специалисттæ федтой, дуканиты санитарон домæнтæ куыд æххæст кæнынц, уый
Уæрæсейы фæлхасадмæ цæстдарды республикон Управленийы кусджытæ рацыдысты радон рейды, æмæ сбæрæг кодтой Дзæуджыхъæуы базарадон объекттæ. Ведомствойы специалисттæ федтой, дуканиты санитарон домæнтæ куыд æххæст кæнынц, уый. Æнæмæнг фæтк у маскæтæ æмæ æрмкъухтæ дарын. Уымæй дарддæр – бæстыхæйттæ дезинфекцион фæрæзтæй æххæстгонд сты, æви нæ, уый. Хъуамæ ма алы дуканийы дæр у тæвд барыны бæрæггæнæнтимæ журнал. Æххæст кæнын хъæуы социалон дистанци.
Æппæт домæнтæй кæд искæцы æххæстгонд нæ цæуы, уæд дуканиты хицæуттæн бакæнынц уайдзæф. Кæд дыууæ пункты æмæ фылдæр не ххæст кæнынц, уæд та баййафдзысты æфхæрд. 30-æм апрелæй фæстæмæ рацыдысты ног домæнтæ. Ома санитарон фæтк æххæст кæнгæйæ, дуканийы 200 квадратон метрæй фылдæр куы нæ уа, уæд ын ис бар кусынæн.
