Архайдта дзы нæ республикæйы сæргълæууæг Битарты Вячеслав
Уæрæсейы президент Владимир Путин сарæзта селекторон æмбырд регионты разамонджытимæ. Архайдта дзы нæ республикæйы сæргълæууæг Битарты Вячеслав, æнæниздзинадхъахъхъæнынады министр Годжысаты Тамерлан, сæйраг федералон инспектор Челæхсаты Владимир æмæ фæлхасадмæ цæстдарды цæгатирыстойнаг Управленийы разамонæг Тыбылты Алан.
Ныхас цыд коронавирусы инфекци дарддæр парахат кæнын ма бауадзыныл. Йæ раныхасы куыд загъта, афтæмæй æнæкусгæ бонтæ нæ бæстæйы ахæццæ уыдзысты 11-æм маймæ. Æдасдзинады мадзæлттæ хъæуы æнæмæнг дарддæр хæццæ кæнын. Уæрæсейы Хицауадæн, фæлхасадмæ цæстдарды Управленийæн æмæ Паддзахадон советы кусæг къордæн Президент бабар кодта къуырийы мгъуыдмæ, ома 5-æм маймæ бацæттæ кæнын бæлвырд мадзæлттæ, изоляцийы фæткæй рацæуынæн. Уыимæ – эпидемиологон уавæр хынцæгæйæ. Уымæй дарддæр хъæуы регионты цæрджытæн æмæ экономикæйы рæзтæн баххуыс кæнын, загъта Владимир Путин.