филиал вгтрк государственная телерадиовещательная компания “Алания”

Сабатæй хуыцаубонмæ æхсæв аргъуанты цыдысты бæрæгбоны аргъуыдтытæ. Бæрæгбоны сæйраг мадзæлттæ ацыдысты Дзæуджыхъæуы, Сыгъдæг Георгийы аргъуаны. Дзæуджыхъæуы æмæ Алайнаг Архиепископ Зосимæ райсомæй фæстæмæ кодта Куадзæны аргъуыдтытæ. Уый фæстæ уыд Дзуæрттимæ цыд. Уырнæг адæм цымыдисæй æнхъæлмæ кастысты хæрзаудæггæнæг зынгмæ. Иерусалимæй йæ сластой Мæскуымæ, уырдыгæй та– Дзæуджыхъæумæ. Архиепископ Зосимæ, Цæгат Ирыстоны цæрджытæн æмæ дины куысджытæн ракодта бæрæгбоны арфæтæ. Сæрмагонд фæткмæ гæсгæ куыстой республикæйы барадхъахъхъæнæг оргæнтæ дæр.

Гаглойты Саввæ, Дзæуджыхъæуы æмæ Махачкалайы епархийы секретарь: «Сты куадзæны бонтæ æмæ æгас чырыстон адæм æнæхъæн дунейы æмæ Ирыстоны дæр стыр цинимæ æмæ æргом зæрдæимæ сæмбæлдысты ацы диссаджы бæрæгбоныл – Есо Чырыстийы райгасыл. уый у адæймагæн ныфсы хос, ныфсы гуырæн».

Муриты Марк, Уæлахизхæссæг Георгийы аргъуаны хоры зарæггæнæг: «Чырысти райгас, цæмæй махæн радта æнустæм цард, æмæ уæдæй бонмæ адæймаг мæлгæ нал кæны, йæ уд цæры адæймагæн æнусмæ».