Нырма уал Уæрæсейы хыгъды ис 2 бынæттон вакцинæйы, рæхджы ма сæм бафтдзæн æртыккаг
Знонæй фæстæмæ нæ бæстæйы Президент Владимир Путины амындмæ гæсгæ, æппæт уæрæсейæгтæн райдыдта коронавирусы ныхмæ егъау вакцинаци. Нырма уал Уæрæсейы хыгъды ис 2 бынæттон вакцинæйы, рæхджы ма сæм бафтдзæн æртыккаг. Прививкæйы размæ хъæуы скæнын медицинон æркаст: пациентмæ хъуамæ ма уой хæцгæ низты миниуджытæ. Дарддæр алчидæр бафыссы сæрмагонд гæххæтт, вакцинациимæ разы кæй у, уый фæдыл. Вакцинаци йæхæдæг бацахсы цалдæр секунды. Медицинон хо скæны укол, уый фæстæ пациент равзары бон ног къæпхæнæн. Уæд æм бахæсдзысты препараты дыккаг компонент. Бæлвырд куыд у, афтæмæй, антитела кæй хонынц, уыдон адæймаджы буары фæзынынц дыккаг кæнæ æртыккаг къуырийы, вакцинацийы фыццаг къæпхæны фæстæ. Пациенттæн сæ фылдæр вакцинацийы рæстæг сæхи хорз фенкъарынц. Иртæстытæ куыд равдисынц, афтæмæй алы дæсæм адæймагæн схизы йæ буары тæвд, æмæ йæхи фенкъары лæмæгъ. Алы фæндæм адæймагæн гæнæн ис, æмæ исты фæд фæзыны вакцинæйы бынаты. Фæлæ уымæн сæрмагонд дзæбæхгæнæн мадзæлттæ кæнын нæ хъæуы. Ныртæккæ Уæрæсейы вакцинацийæн цæттæ сты 168 мин вакцинæйы «Спутник V». Ног инфекци парахат кæнын ма бауадзынæн, прививкæтæ скæнын хъæуы 40 милуан адæймагæн, зæгъынц эпидемиологтæ.
