филиал вгтрк государственная телерадиовещательная компания “Алания”

16:13 понедельник, 21 октября 2019
22 марта, 11:19
1
5
Цалцæггæнæн куыстыты фæстæ Цыколайы рынчындоны байгом арæн хайад
Сæхгæдтой йæ 2 азы размæ æмæ уымæ гæсгæ æнхъæлцау сылгоймæгты цæуын хъуыд Дигорамæ кæнæ Дзæуджыхъæумæ. Цалцæгонд хайады ныртæккæ ис æппæт фадæттæ дæр. Æнæниздзинадхъахъхъæнынад ногдзинæдтæй сифтонг кæныны программæмæ гæсгæ райстой 2 милуан сомы аргъ ног кусæнгæрзтæ. Хайад куыд байгом кодтой, уый федта нæ уацхæссæг Сосранты Жаннæ дæр, æмæ йын дæттæм ныхасы бар.

Ацы кадртæ куы систам, уæдæй бирæ рæстæг нæ рацыд. Арæндоны хайады кусджыты уырнгæ дæр нæ кодта, арæндон афтæ тагъд кæй сцалцæг кæндзысты, уый. Цы ивддзинæдтæ дзы ‘рцыд, уыдонæй дохтыртæ сты разы, æмæ тынг зæрдиагæй æнхъæлмæ кæсынц ноггуырдтæм…

Гæбеты-Гæзæнты Азæ, Æрæфы районы рынчындоны арæндоны хайады акушеркæ: «Æнæхъæртон хъуыддæгтæ нæм тынг бирæ уыд. Нæ авналæнтæ нал бæззæдысты».

Арæндон цалцæггæнгæйæ лæмбынæг каст цыд санитарон домæнтæ æххæст кæнынмæ. Æрæфы районы сæргълæууæг Бекмæрзты Валерийы ныхæстæм гæсгæ, æрмæст цыбыр рæстæгмæ сцалцæг кæныныл нæ хъуыды кодтой, фæлæ сын сæйрагдæр уыд æппæт хъуыддæгтæ дæр хæрзхъæд æрмæджытæй саразын. Раздæр-иу арæндоны къултæ пластикæй конд уыдысты, санитарон фæткмæ гæсгæ уый раст нæ уыди. Нæ дзы хъарм дон уыд, нæдæр æндæр гæнæнтæ, æмæ-иу æнхъæлцау сылгоймæгты хъуыди Дигорамæ, Æрыдонмæ, кæнæ Дзæуджыхъæумæ цæуын.

Бекмæрзты Валерий, Æрæфы районы сæргълæууæг: «Ам цы уавæртæ уыди, уыдон куы федтам республикæйы хицауады уæнгтимæ, уæд уынаффæ рахастам, цыбыр рæстæгмæ цыфæндыйæ дæр сцалцæг кæнын. Куыд уынут, афтæмæй нын бантыст. Тынг разы дæн чи нын баххуыс кодта, уыдонæй. Районы æнхъæлцау сылгоймæгтæ бирæ фæтухитæ кодтой, æндæр рæттæм цæугæйæ».

Арæндон байгом кæнынмæ цы уазджытæ æрбацыд, уыдон дис кодтой куыстыты хæрзхъæддзинадыл. Республикæйы æнæниздзинадхъахъхъæнынады министр Владимир Силиванов лæмбынæг æркаст хайады хъуагдзинæдтæм, æмæ сын зæрдæ бавæрдта цыбыр рæстæгмæ арæндоны æппæт гæнæнтæ дæр кæй уыдзæн, уымæй.

Гуæцæлты     Венерæ,     РЦИ-Аланийы хицауады сæрдары æххуысгæнæг: «Хицауад тын зæрдиагæй кусы демографион фарстайыл. Мæнæ Æрæфы районы цы хорздзинад сарæзтой, уый дæр, радон хатт, уымæн у æвдисæн».

Ивд æрцыдысты коммуникацитæ, хæтæлтæ, хъармгæнæнтæ. Дохтырты хъуыдымæ гæсгæ, мад æмæ сывæллон арæндонæй æнæнизæй цæмæй рацæуой, уый тыххæй хъуамæ хайад æппæт нырыккон домæнтæн дзуапп дæтта.

Ошибка в тексте? Выделите её и нажмите «Ctrl + Enter»

Комментарии для сайта Cackle

Сообщить об опечатке

Текст, который будет отправлен нашим редакторам: