филиал вгтрк государственная телерадиовещательная компания “Алания”

01:50 суббота, 16 ноября 2019
25 марта, 17:10
28
5
Ирон драматургийы æмæ дыгурон поэзийы бындурæвæрæг Гуырдзыбегты Бласкайы хæдзар хъæуы бахъахъхъæнын
Ирон драматургийы æмæ дыгурон поэзийы бындурæвæрæг Гуырдзыбегты Бласкайыл ацы мæй сæххæст 145 азы. Йæ аивадуарзджыты тынг фæнды цæмæй республикæйы уа йæ номыл музей. Растдæр зæгъгæйæ та, кæм цард, уыцы хæдзары.

Ныр дæр ма Мæздæджы фенæн ис ивгъуыд æнусты æвдисæн, Бласкайы фыдыуæзæг. Йæ хуыз нæ аивта, фæлæ ыл рæстæг йæ фæд ныууагъта… Æмæ йæм æвæстиатæй куы нæ базилой, уæд заууаты бынатмæ æрхаудзæн.

Цæмæн ахæм уавæры ис Гуырдзыбегты Бласкайы хæдзар?

3 азы размæ Сечъынаты Сослан чиныг фыссын райдыдта Гуырдзыбегты Блашкайы сфæлдыстады тыххæй. Æрыгон автор куыд зæгъы, афтæмæй фыссæджы курдиатæй уæлдай йæ уацмысы ныхас цæудзæн ирон адæмы историйыл дæр. Рæстæг нæ сафгæйæ Сослан æрмæг æмбырд кæны уыцы азтæн ма æвдисæн чи у, уыдонæй. Ацæргæ адæм цы бирæ цымыдиссаг хабæрттæ зонынц, уыдон чиныджы фыст никуы сты.

Цалдæр æнусы размæ Мæздæджы зæххытыл æрцардысты Дыгуры хæхты адæм. Афтæ, Гуырдзыбегты Блашка райгуырд æмæ схъомыл станицæ Ново-Осетинскийы. Ам райдыдта йæ сфæлдыстадон фæндаг дæр, фæлæ йын хъыгагæн бирæ нæ ахаста.

Блашка 37 азы йеддæмæ нæ фæцард. Фæлæ йе сфæлдыстадон бынтæ сты егъау.
Станицæйы скъолайы, библиотекæйы стæй Ново-Осетинскийы алы хæдзары дæр мартъийы фæмысынц Блашкайы рухс ном, йæ ирд сфæлдыстад æмæ Хуыцауæй лæвæрд курдиат. Скъоладзаутæ йын æнæмæнг бабæрæг кæнынц йæ ингæн.

Ново-Осетинскийы цæрджытæ æмæ республикæйы интеллигенцийы минæвæрттæ цалдæр азы дзурынц фыссæджы хæдзарæй музей саразыны хъуыддагыл. Зæгъын хъæуы уый, æмæ хæдзар Гуырдзыбегты рагæй нал у.

Блашка цы хæдзары райгуырд æмæ схъомыл уый ныр у кæйдæр исбон. Фæлæ йæ дуæрттæ æдзух сты гом. Хицау уым нæ вæййы, æмæ хæдзар бонæй-бон тынгдæр заууатмæ цæуы.

Хæдзары хъысмæтыл ныхас кодтой Гуырдзыбегты мыггаджы минæвæрттæ, фæлæ сæм хъуыддаг аивынæн нæ фæрæзтæ, нæ бартæ нæй. Ройоны хацауадмæ цы курдиæттæ арвыстой, уыдонæй дæр ницы рауад.

Бюджеты закъонмæ гæсгæ культурæ æмæ дзыллон коммуникациты министрадæн дæр бар нæй бæстыхæйттæ æлхæнынæн. Суанг ахæм арфæйаг хъуыддаджы тыххæй дæр.

Хæдзары бакастæй зæрдæ мæгуыр кæны. Рæстæг ыл тынг фæзынд. Хъуыддагмæ ныртæккæ рæвдз куы ничи фæлæууа, уæд йæ фидæн цы уыдзæн, уый бæлвырд у.

Касаты Наирæ

Ошибка в тексте? Выделите её и нажмите «Ctrl + Enter»

Комментарии для сайта Cackle

Сообщить об опечатке

Текст, который будет отправлен нашим редакторам: