филиал вгтрк государственная телерадиовещательная компания “Алания”

14:18 пятница, 15 ноября 2019
28 марта, 17:14
3
5
Абон уыд Парламенты 9-æм æмбырд
Абон уыд Парламенты 9-æм æмбырд. Амыдта йæ Алексей Мачнев. Депутаттæ æркастысты «Æхсæнадон палатæйы тыххæй» закъонмæ ивддзинæдтæ бахæссыны фарстамæ. Уымæ гæсгæ хъуамæ фæуæлдæр уа палатæйы ахадындзинад. Фидаргонд æрцыдысты Хицауады æмæ бынæттон хиуынаффæйады архайдимæ баст закъонтæ.

Æмбырды ивддзинæдтæ хаст æрцыдысты республикон бюджетмæ. Ацы фарстайыл дзургæйæ, депутаттæ стыр æргом аздæхтой бюджетон кусæндæтты кусджыты мызд фæфылдæр кæныны æмæ йæ афоныл фидыны фарстамæ. Финансты министрад куыд нымайы, афтæмæй фæззæгмæ къуылымпыдзинæдтæ нæй, цы зындзинæдтæ сæвзæрд, уыдон алыг кæныныл куыст цæуы.

Хицауады сахаты ныхас цыд фермерон хæдзарæдты архайдыл. Хъæууон хæдзарады министрады информацимæ гæсгæ, абон нæ республикæйы сты 1012, уыдонæй 86% кæнынц зайæгойты куыст, иннæтæ та – фос дарыны. Сæ архайды бæрæггæнæнтæ азæй-азмæ бæрзонддæр кæнынц, фæлæ лыггæнинаг фарстатæ уæддæр ныма бирæ ис.

Засеты Роберт, РЦИ-Аланийы хъæууон хæдзарады æмæ хойраджы министр: «Фермертæн сæ куыст бæгуыдæр фæхуыздæр, фæлæ куыд æмбæлы, афтæ нæма кусынц. Æрмæст сæхи аххос нæу. Сæ фæрæзтæ нæ фаг кæнынц. Сæ бон цас у, уыйбæрц архайынц, фæлæ ма сæм Хицауад фылдæр æргом куы раздахид, уæд хуыздæр уаид. Стæй ма сæм сæхи хицауадæй дæр фаг хъусдард нæй».

Фермерты уавæрыл дзургæйæ, куыд бафиппайдтой, афтæмæй ацы къабазы авналæнтæй æххæстæй нæ пайда кæнынц. Уымæй уæлдай, хæдзарæдтæн кредит райсын, сæ продукци ауæй кæнын нырма зын у. Ацы фарстатæм хъæуы лæмбынæгæй æркæсын. Уæлдай стыр æргом здæхт ма хъуамæ уа хæххон хъæутæм, цæмæй фермерон хæдзарæдтæ парахат кæной æмæ хъæутæ æдзæрæг ма кæной.

Битарты Вячеслав, РЦИ-Аланийы Парламенты депутат: «Мæнмæ гæсгæ, рæдыд уыди, Уæрæсейы хицауад уынаффæ куы рахаста гыццыл скъолатæ æхгæныны тыххæй. Хъæуы скъола куы сæхгæной, уæд бинонтæ дæр сыстынц æмæ ацæуынц, хуыздæр фадæттæ кæм ис, скъола кæм ис, уырдæм, ома, горæтмæ. Нæ хæхты бирæ рæтты зæххытæ хъуына кæнын райдыдтой, æмæ дзы гыцыл фæстæдæр нæ фос хизæн уыдзæн, нæ хос кæрдæн. Уыцы фарстатыл бакусын хъæудзæн Парламентæн дæр, Хицауадæн дæр. Цæмæй адæм фæстæмæ хæхтæм раздæхой, ахæм фадæттæ скæнын».

Депутаттæ сфидар кодтой цалдæр курдиаты уæлдæр хицауадмæ, цæмæй хъæбысхæст хъахъхъæд æрцæуа, куыд Олимпаг хъæзтыты хуыз, цæмæй фæкъаддæр уа амалхъом адæмы фиддонты бæрц пенсион фондмæ, стæй цæмæй фæфылдæр уа ноггуырд сывæллæттæм зилыны æмгъуыд, бæлвырддæр та, фæллойадон пенси нымайгæйæ кæй фæхынцынц, уый.

Фæрниаты Мæдинæ

Ошибка в тексте? Выделите её и нажмите «Ctrl + Enter»

Комментарии для сайта Cackle

Сообщить об опечатке

Текст, который будет отправлен нашим редакторам: