филиал вгтрк государственная телерадиовещательная компания “Алания”

23:06 воскресенье, 17 ноября 2019
29 марта, 12:20
6
5
Цъæйы цæуынц ирвæзынгæнджыты ахуыртæ
Ирвæзынгæнджыты ахуыртæн Цъæйы иттæг хорз уавæртæ кæй ис, уый агурæн-сгарæн къорды уæнгтæ зонынц. Иумæйаг ахуыртæм арæх ссæуынц æрмæст Цæгат Кавказы нæ, фæлæ Уæрæсейы бирæ регионтæй дæр. Ацы хатт хæххон уавæрты ахуыр кæнынмæ ссыдысты Ахтюбинск æмæ Знаменскæйы æвзонг ирвæзынгæнджытæ.

Хæххон цæугæдæтты сæрты ахизын. Ахæм у Астраханы облæсты æвзонг ирвæзынгæнджыты ахуырты домæнтæй иу. Ахуыртæ цæуынц Цæгат Ирыстоны æнæнхъæлæджы уавæрты министрады базæйы Цъæйы. Ацы хатт дзы архайынц 17 азы онг куыл цæуы, ахæм 30 лæппуйы Ахтубинск æмæ Знаменскæйæ.

Ахуыргæнæн къорды разамонæг Сергей Мельниковы ныхæстæм гæсгæ, тынг разы сты, ам ахуыр кæныны фадат сын кæй ис, уымæй. Сæхимæ Знаменскы хæхтæ нæй, фæлæ æвзонг ирвæзынгæнджытæ хъуамæ зоной, хæхты куыд архайын хъæуы, уый. Ныры онг сын уыцы зонындзинæдтæ уыдысты æрмæстдæр теорийæ. Практикон амынддзинæдтæ райсынмæ ссыдысты Цъæймæ.

Се хсæн Таисия Колосова дæр. У «Æвзонг ирвæзæнгæнджыты» уæнг. Ахуыртæ Цæгат Ирыстоны цæудзысты, уый куы базыдта, уæд уайтагъддæр сразы. Цъæйы фыццаг хатт ис æмæ йæ зæрдæмæ тынг фæцыд.

Таисия Колосова, Знаменскы «Æвзонг ирвæзынгæнджыты» уæнг: «Фидæны мæ ацы зонындзинæдтæ бæгъуыдæр бахъæудзысты. Ныры онг дæр цæуыл сахуыр стæм, уый хорз у. Фæлæ ам цы базондзыстæм, уый та ноджы хуыздæр у. Скъолайы фæстæ мæ фæнды ахуыр кæнынмæ бацæуын медицинон институтмæ. Дохтырты æххуыс та кæм нæ бахъæуы, ахæм нæ вæййы. Хæхты дæр адæм рынчын кæнынц. Цæвтæ райсынц. Фыдбылызты бахауынц. Æмæ хъуамæ зонон, куыд сын баххуыс кæнæн ис, уый. Куыд сæ фервæзын кæнæн ис, уый».

Ирвæзынгæнджыты ахуырты радон къæпхæн – хæхтыл бырын. Сæххæст кæнын сæ хъæуы дыууæ хæслæвæрды: хохы цъуппмæ быргæйæ схизын æмæ бæндæныл. Кæд æнцон хъуыддаг нæу, уæддæр æй иууылдæр æнцонтæй сæххæст кодтой. Куыд зæгъынц, афтæмæй сын Цъæйы рæсугъд æрдз дæр æххуыс кæны.

Алы бон дæр сывæллæтимæ кусынц Цæгат Ирыстоны æнæнхъæлæджы уавæрты министрады ирвæзынгæнджытæ. Куыд фæбæрæг кодтой, афтæмæй теорийæ лæппутæ æмæ чызджытæ тынг хорз цæттæ сты.

Цъæйы ахуыртæ цыдысты къуыри. Уæдмæ сахуыр сты хæххон цæугæдæтты сæрты хизын, къæдзоныгътыл бырын, зæйтæ рацæуыны рæстæг хи куыд дарын хъæуы æмæ фыдбылызы бахауæг адæмæн куыд баххуыс кæнæн ис, уый».

Чи зоны æмæ ацы къорды уæнгтæй ирвæзынгæнæг ничи суыдзæн. Фæлæ уæддæр бахъуаджы сахат сæ бон уыдзæн алкæмæн дæр алывæрсыг æххуыс бакæнын.

Ошибка в тексте? Выделите её и нажмите «Ctrl + Enter»

Комментарии для сайта Cackle

Сообщить об опечатке

Текст, который будет отправлен нашим редакторам: