филиал вгтрк государственная телерадиовещательная компания “Алания”

16:05 понедельник, 21 октября 2019
04 апреля, 17:59
1
5
Регионты `хсæн фæндзæм фестивалы Липецкы азæлыдысты ирон фæндыры зæлтæ
Регионты `хсæн фæндзæм фестивалы Липецкы азæлыдысты ирон фæндыры зæлтæ. Ансамбль «Хæзныдон» æрбацæуджыты дисы бафтыдта ирон аив кафтæй. Базонгæ сæ кодта ирон æгъдæуттимæ æмæ культурæимæ.

Æрæфы районы хъæу Хæзныдон кæд стыр нæу, уæддæр хъуыстгонд у. Схъомыл дзы бирæ фæзминаг фæсивæд. Сывæллæттæн куыд хæдзары, афтæ скъолайы дæр се гъдау, сæ адæмы уарзондзинад фыццаг бынаты æвæрынц. Стæй ма дзы ис, хистæр фæлтæртæй чи баззад ахæм фæзминаг хъуыддаг – кафын. Уый сын сæ фарныл фарн æфтауы, се `гъдауыл — æгъдау. Йæ фæрцы Ирыстоны, стæй сæ гыццыл Хæзныдоны кой айхъуысын кодтой æнæхъæн Уæрæсейы. Ныр дæр та фыццаг бынаты дипломимæ ссыдысты Липецкæй регионты `хсæн фестивалæй.

Малиты Еленæ, кафты ансамбль «Хæзныдон»- ы фæндырдзæгъдæг: «Тынг ныл цин кодтой фестивалы архайджытæ. Бирæтæн цымыдисаг уыдысты нæ музыкалон инструменттæ. Фарстой нæ, кастысты сæм».

Хъæуы кафты фарн бахъахъхъæныныл зæрдиагæй бакуыстой Хæзныдонæй рацæуæг адæм. Уыдоны фæрцы сывæллæттæн цалдæр хуызы кафты равдисынæн ис аив уæлæдарæс. Раппæлинаг у, ацы сывæллæттæн сæ курдиат раргом кæнынæн цы фадæттæ ис, уыдон. Сарæзта сын сæ, йæ хъæуы фидæнмæ куыдфæндыйы цæстæй чи нæ кæсы, уыцы Боллоты Таймураз. Бирæ кафджытæн ахæм зал у сæ бæллиц.
Дæгуыйты Хъазыбег, кафты ансамбль «Хæзныдон»-ы архайæг: «Махæн тынг æхсызгон уыд уым архайын. Бирæ ног фæсивæдимæ базонгæ стæм. Иннæ адæмты культурæ дæр базыдтам, нæхи æгъдæуттæ дæр равдыстам».

Сосранты Каринæ: кафты ансамбль «Хæзныдон»-ы архайæг: «Фæндагыл цæугæйæ дæр нын тынг хъæлдзæг уыд, стæй уым дæр. Бирæ рæстæг уыцы рæсугъд æнкъарæнтæ нæ зæрдæты лæудзысты».

Ацы къорды 11 азмæ кафыд цалдæр фæлтæры. Архайдтой Уæрæсейы горæтты алыхуызон фестивальты. Абон сæ дипломтæ æмæ грамотæтæм кæсгæйæ уырнгæ дæр нæ кæны, уыйбæрц рæтты архайдтой, уый.

Гæдзаонты Анатолий, кафты ансамбль «Хæзныдон»-ы аивадон разамонæг: «Фестиваль нæ зæрдæмæ тынг фæцыд. Сценæйæ нæ нал уагътой.. Кафт нын нæ сывæллæтты ахуыр кæны бирæ хорздзинæдтыл. Липецкы сæ æгъдау, сæ ирондзинадæй иннæтæй хицæн кодтой. Тынг æхсызгонд нын у, ацы фестивальмæ та кæй ацыдыстæм, уый. Тынг арфæйаг стæм Боллоты Таймуразæй».

Ацы сывæллæттæй бирæтæ сæ кафты фæрцы федтой иннæ адæмты культурæ æмæ æгъдæуттæ. Цы бирæ горæтты архайдтой, уым та сæ абон дæр хъуыды кæнынц. Алы фестиваль дæр сын сæ зæрдæты ныууадзы рæсугъд æнкъарæнтæ. Балетмейстертæ Хъæцмæзты Батрадз æмæ Гæдзаонты Анатолий архайынц, цæмæй иу фестивалæй иннæмæ сывæллæттæ аивадуарзджыты размæ сæ курдиат хæссой ирддæрæй.

Сосранты Жаннæ

Ошибка в тексте? Выделите её и нажмите «Ctrl + Enter»

Комментарии для сайта Cackle

Сообщить об опечатке

Текст, который будет отправлен нашим редакторам: