филиал вгтрк государственная телерадиовещательная компания “Алания”

13:13 пятница, 15 ноября 2019
05 апреля, 11:18
5
5
7-æм профессионалон училищæйы арæзт æрцыд Лолаты Æхсарбеджы мысæн изæр
16 азæй фылдæр рацыд, михъуыддæгты министрады мидæфсæдты хистæр лейтенант йæ цардæй куы ахицæн, уæдæй нырмæ. Йе ‘фсæддон хæс æххæстгæнгæйæ фæмард Цæцæны республикæйы. Æхсарбеджы хъæбатырдзинад абон дæнцæгæн хæссынц училищæйы ахуырдзаутæн.

Ацы зарæг иу адæймаджы дæр æнæ цæссыг æркалгæ нæ ныууагъта. Лолаты Æхсарбег 7-æм профессионалон училищæ каст фæцис 24 азы размæ, фæлæ абон дæр йæ ном ам рох нæу. Мидхъуыддæгты министрады мидæфсæдты хистæр лейтенант 1996-æм азы июнæй фæстæмæ службæ кодта Цæцæны республикæйы. 10-æм августы поселок Черноречьейы, сæрмагонд операцийы рæстæг цалдæр цæфы фæци. Йе ‘фсæддон хæлæртты цæмæй боевиктæй фервæзын кæна, уый тыххæй нæ бавгъау кодта йæхи цард.

Гаглойты Дато, Лолаты Æхсарбеджы æфсæддон хæлар: «Уыдис бынтон хуымæтæг адæймаг. Тынг æгъдауджын, æнæфсарм ныхас никуы скодта, никуы бахъыгдардтаид йæ кæстæрты, йæ салдæтты».

Мысæн изæрмæ æрбацыдысты Æхсарбеджы бинонтæ, йæ хæстæджытæ, хæлæрттæ, æфсæддонтæ, ветерантæ, æхсæнадон организациты минæвæрттæ. Уыдысты дзы уазджытæ йæ райгуырæн хъæу – Хъæдгæронæй дæр. Уым се ппæтæн дæр зонгæ у Лолаты Æхсарбеджы ном.

Кæсæбиты Розæ, Хъæдгæроны астæуккаг скъолайы ахуыргæнæг: «Абон дæр Хъæдгæроны лæппу куы райгуыры, уæд ыл бирæты фæфæнды Æхсар ном сæвæрын. Уый æрмæст уымæн нæ, æмæ ныфс, кад нысан кæны. Уыцы номимæ бирæ ирон лæппутæ кад æмæ радимæ фæцардысты. Уыдонимæ Æхсар дæр».

7-æм училищæйы студенттæ бацæттæ кодтой литературон-музыкалон композици. Баст уыд, Лолаты Æхсарбег йæ службæйы рæстæг цы хъæбатырдзинад равдыста, уыимæ. Ныфсхаст æфсæддоны бинонтæ бузныг уыдысты, ацы изæр бацæттæ кæныныл чи бацархайдта, уыдонæй.

Лолаты Ритæ, Лолаты Æхсарбеджы хо: «16 азы æмæ рдæг рацыд, фæлæ уæддæр цыма 16 боны дæр, 16 сахаты дæр не сты, цæстытыл афтæ уайы. Куы нын загътой æвирхъау хабарæй, æз мæхимæ æрæгмæ æрцыдтæн. 4 боны махыл не сæмбæлдис не фсымæр».

Лолаты Æхсарбег йæ мæлæты фæстæ хорзæхгонд æрцыд Лæгдзинады орденæй. Йæ ном æнустæм баззайдзæн чи йæ зыдта, уыдоны зæрдæты.

Хъайтмазты Дзерассæ

Ошибка в тексте? Выделите её и нажмите «Ctrl + Enter»

Комментарии для сайта Cackle

Сообщить об опечатке

Текст, который будет отправлен нашим редакторам: