филиал вгтрк государственная телерадиовещательная компания “Алания”

22:39 вторник, 26 мая 2020
15 марта, 15:25
110
5
Ирыстоны кады мæсыг
Ирыстоны кады мæсыг
Ирыстоны кады мæсыг. Афтæ схонæн ис зындгонд артист Уататы Бибойы. Абон йæ райгуырдыл сæххæст 80 азы. Не мзæххон, кино æмæ театры актеры ном дæрдтыл айхъуысти. Адæмæн йæхи базонын кодта, Щукины номыл театралон институт каст фæуыны фæстæ. Уæд райдыдтой йæ бирæ рольтæ æмæ сурæттæ. Уыимæ — алкæцы дæр ирд æмæ хицæн ныхасы аккаг. Уæрæсейы æмæ Цæгат Ирыстоны театралон аивады рæзтмæ Уататы Бибо стыр æвæрæн кæй бахаста, уый тыххæй йын лæвæрд æрцыд бирæ хæрзиуджытæ. Хъыгагæн, йæ цардæй ахицæн, йæ курдиат йæ тæмæны куы бацыд, уæд. Не хсæн нал ис, фæлæ цæры йæ ном. Сызгъæрин курдиаты æмæ зæрдæйы хицауы цардыл афæлгæст нæ уацхæссæг Къутæрты Аидæ.
Ирон хуымæтæг нæлгоймаг, æмбаргæ адæймаг, кæстæртæн куырхон хистæр. Уататы Бибойæн уыд цардмæ йæхи цымыдисаг цæстæнгас. Йе мгæрттæ æмæ курдиат уарзджытæ йæ хъуыды кæнынц куыд рæстзæрдæ æмæ æргом ныхас адæймаг. Йæ бинонтæ æмæ хæлæрттæн та Бибо…Нæхи Бибо…
Уататы Бибо райгуырд 15 мартъийы 1939 азы Ног Бæтæхъойы. Каст фæци хъæуы астæуккаг скъола. У Щукины номыл театралон училищæйы рауагъдон. Зæгъæн ис, æмæ Бибо йæ æмкурсонтимæ бындур сæвæрдта Мæскуыйы Таганкæйы театрæн. Уæрæсейы Федерацийы æмæ Цæгат Ирыстоны адæмон артист, Хетæгкаты Къостайы номыл æмæ Таджикистаны Рудакийы номыл Паддзахадон премиты лауреат. Хæлардзинады ордены кавалер æмæ «Человек – народное достояние России»-йы кадджын номхæссæг, Цæгат Ирыстоны раздæры культурæйы министр.
Бибойы хъысмæт æнцон нæ уыд. Фæлæ йæ царды зын фæзилæнты йæхи хъæддыхæй равыдста. Алы адæймагæн дæр æххуыс кодта. Бахъуаджы сахат – иу йе ‘мбæлтты уæлхъус æрбалæууыд.
Цы диссаджы фæлгонцтæ сарæзта, уыдон – иу театрдзауты дисы бафтыдтой. Цыдæр æнахуыр æнкъарæнтæ æвзæрыдысты сæ зæрдæты. Ферох сæ – иу сты сæ зындзинæдтæ, Бибойы сфæлдыстады – иу арф аныгъуылыдсты. Æвæццæгæн, йæ сыгъдæг зæрдæйы тæгтæ адæмæн лæвар кодтой удæнцой. Бибомæ уыцы миниуджытæ дзæгъæлы нæ уыдысты. Мæнгæй нæ фæзæгъынц: «Туг дон нæу» зæгъгæ. Уыцы фарн уыд Бибайæн йæ туджы, уыд фæдзæхст йæ хистæртæй. Уыцы æнахуыр тых абон дæр æнцонæй банкъарæн ис йæ райгуырæн хъæуы уæвгæйæ Уататы хæдзары къæсæрæй бахизгæйæ. Адæймаг цыма рæстæджы сæрты бахизы, афтæ йæм фæкæсы…
«На семи ветрах», «Хасан – арбекеш», «Поэма двух сердец», «Чермен», «Раненные Камни», «Горец» æмæ ма бирæ æндæр спектакльтæ æмæ кинонывты бакуыста Бибо. Йæ æнæнхин сфæлдыстадæн кæрон нæ уыд, йæ хъайтарты миддуне та æвдыста æххæст æмæ фæлхатгондæй.
15 мартъийы Бибойы райгуырдыл сæххæст 80 азы. Фæлæ…хъыгагæн абон не ‘хсæн нал ис. Фæлæ йæ алæмæтаг аивад æнусты баззайдзæн адæмы зæрдæты.

Ошибка в тексте? Выделите её и нажмите «Ctrl + Enter»

Комментарии для сайта Cackle

Сообщить об опечатке

Текст, который будет отправлен нашим редакторам: