Хетæджы Уастырджийы бæрæгбон у Ирыстоны зындгонддæр æмæ кадджындæр бæрæгбонтæй иу. Абоны онг дæр адæмы дисы æфтауы, тыгъд быдыры тæккæ астæу ацы диссаджы къох куыд равзæрд, уый.
Йæ легендæ рагæй зындгонд у, æцæг, фæстаг рæстæг историктæ æмæ этнографтæ æрцыдысты ахæм хъуыдымæ, зæгъгæ, кæсгон æлдæртты кой æмæ иумæйагæй кæсгон темæ фæзынд æрæджиау, сæрмагондæй та Къостайы рæстæг. Йæ аххос та – ирон адæмы æхсæнадон æмæ социалон уавæртæ. Уыдон хæххон уавæрты уыдысты æвадат, æнæзæхх, уыдис сын бынтон мæгуырау, къуындæг царды уавæртæ æмæ афтæ дарддæр. Уымæ гæсгæ афтæ рауад, æмæ уыцы дуджы хъæздыгдæр æмæ цæрыны фадæттæй бирæ парахатдæр кæсгон адæм уыдысты кадджын ирон адæмы цæсты. Уымæн баззад ахæм ныхæстæ, куыд кæсгон бæх ,кæсгон уæздæттæ æмæ ма иукъорд æндæр ахæм дзырдбасты. Æмæ Хетæджы мыггаг дæр сæ равзæрд кæсгон адæмимæ уымæн сбастой.
Хетæджы Уастырджийы бæрæгбоны фæдыл бирæ традицитæ ис. Зæгъæм, уырдыгæй иу къæцæл рахæссæн дæр нæй. Хетæджы Уастырджи æххуыс кæны, сыгъдæг зæрдæйæ йæм кувынмæ, чи цæуы, æрмæстдæр ахæм адæмæн. Сылгоймæгтæ йæм цæуын райдыдтой Стыр фыдыбæстæйон хæсты фæстæ- нæлгоймаг нал баззад, се ппæт дæр хæстмæ ацыдысты, æмæ уæд сылгоймæгты бахъуыд бар – æнæбары цæуын кувынмæ, сæ хæстонты йыл фæдзæхстой.
Фæстаг рæстæг Ацы бæрæгбон ссис æппæтадæмон. Цæуын æм райдыдтой Хуссар Ирыстонæй дæр.
Ацы аз дæр Хетæджы бынмæ æрбацыд тынг бирæ адæм. РЦИ-Аланийы мидхъуыддæгты минитсрады бæрæггæнæнтæм гæсгæ, ацы аз кувæн Тымбыл къохы Дзуармæ 20 мин адæймагæй фылдæр æрбацыд. Сæ нымæц, фаронимæ абаргæйæ, у дыууæ хатты фылдæр. Уый та дзуры, адæм се ргом кувынмæ тынгдæр кæй аздæхтой, ууыл. Уыдысты дзы Ирыстоны разамонджытæ дæр. Æрбацæугæ адæмæй бирæтæ дзырдтой, зæгъгæ, фæстаг рæстæг бæрæгбонмæ цæуыны æгъдау фæхуыздæр – ничиуал хæссы ардæм карз нозт ,æмæ уый у тынг хорз хъуыддаг. Зæгъын хъæуы уый тыххæй дæр, æмæ бæрæгбон ацыдис рæсугъдæй, иунæг æнæзæрдæмæдзæугæ хъуыддаг дæр дзы ничи бафиппайдта. Бæрсткуывд ут!
10 июля 2016, 21:02
Хетæджы къох
