Архайдтой дзы кæстæр кълæсты ахуырдзаутæ
Фыййагдоны астæуккаг скъолайы ацыди, æхсæвыгон рухс æздахæнтæ скæнынæй конкурс. Архайдтой дзы кæстæр кълæсты ахуырдзаутæ. Цымыдисаг мадзал арæзт æрцыди Цæгат Ирыстоны паддзахадон автоинспекцийы кусджыты, стæй автомобилистты æппæтуæрæсеон æхсæнады регионалон хайады хъæппæрисæй. Сывæллæттæн байуæрстой рухсгæнæн лентытæ, хæсгæрдтæ, степлертæ æмæ клейтæ. Алкæмæн дæр сæ радтой рæстæг, цæмæй сæххæст кæной сæ размæ вæрд хæстæ. Сфæлдыстадон куысты размæ автоинспектортæ сывæллæтты зæрдыл æрлæууын кодтой фæндаггон æдасдзинады фæтк, рухсгæнæнтæ фистæгæй цæуæгæн цы æххуыс сты, уæлдайдæр та, изæрыгон, уый. Зæгъын хъæуы уый, æмæ ацы куыстмæ ахуырдзаутæ бæрнон цæстæй ракастысты. Рухсгæнæнтæ баныхæстой сæ хызынтыл, уæлдай æхсызгондæр та сын уыди уый, æмæ сæ бацæттæ кодтой сæхæдæг. Конкурсы хатдзæгтæм гæсгæ, 1-аг бынаты аккаг систы дыккæгæм къласы ахуырдзаутæ – Елизаветæ Бабкина, Хъесаты Валерийæ æмæ Диана Лалетина. Сывæллæттæн радтой кады гæххæттытæ æмæ зæрдылдарæн лæвæрттæ. Æнæ *рхъуыдыйæ нæ баззадысты конкурсы иннæ архайджытæ дæр.
