Уымæй дарддæр ма нысантæ скодтой 2021-æм-2022-æм азтæн
Республикæйы хицауады æнæрадон æмбырды хорзыл банымадтой Цæгат Ирыстоны бюджеты проект 2020-æм азмæ. Уымæй дарддæр ма нысантæ скодтой 2021-æм-2022-æм азтæн. Сæйраг финансон документыл бакуыста профилон министрад. Йæ разамонæджы хæстæ æххæстгæнæг Бутаты Хъасполат куыд радзырдта, афтæмæй нысантæм гæсгæ æфтиæгтæ хъуамæ уой 30 миллиарды 953 милуаны æмæ 489 мин сомы. Хæрдзтæ та уыдзысты 30 миллиарды 599 милуаны æмæ 135 мин сомы. Бюджеты проекты æфтиæгтæ хæрдзтæй уыдзысты фылдæр. Уыимæ профицит уыдзæн техникон хуызы. Цæгат Ирыстон иннæ аз хъуамæ бафида паддзахадон хæсы 10%. Уый та у 769 милуан сомы. Бутаты Хъасполат ма куыд загъта, афтæмæй 2020-æм азы паддзахадон хæс суыдзæн 8 миллиарды 97 милуан сомы. Уый хъалонты æмæ æнæхъалон æфтиæгтæй уыдзæн 63 %. Закъоны проектмæ гæсгæ фидæны аз сæ иумæйаг бæрц уыдзæн 12 миллиард сомæй фылдæр. Тускъаты Таймураз министрадты æмæ ведомствоты разамонджытæн бабар кодта профилон комитеттимæ æнгом æмгуыстад кæнын.
