Тельмæны æмæ Мичурины уынгты тигъыл цы фæз ис, уым æрæмбырд сты сæдæгай адæм. Бирæтæ æрбацыдысты сæ бинонтимæ
Ивгъуыд фæлладуадзæн бонты завод «Электроцинчы» раздæры кусджытæ рацыдысты митингмæ. Тельмæны æмæ Мичурины уынгты тигъыл цы фæз ис, уым æрæмбырд сты сæдæгай адæм. Бирæтæ æрбацыдысты сæ бинонтимæ. Хъаст кæнынц сæ царды уавæртыл. Завод куы сæхгæдтой, уæдæй нырмæ афæдз рацыд, фæлæ ныронг сæ бон куыст ссарын нæ бацис. Бирæтæ банктæй дарынц хæстæ. Нæ республикæйы сæ дæсныйад æмæ зонындзинæдты аккаг куыст сæ бон ссарын нæу. Уæвгæ, митинджы архайджытæ куыд зæгъынц, афтæмæй сын куысты бынæттæ лæвæрдтой, фæлæ дзы мызд чысыл фыстой. Куыд зонут, афтæмæй мин кусæгæй æрмæстдæр цыппор æртæ ссардтой куысты бынæттæ. Митинджы архайджыты хъуыдымæ гæсгæ, хъæуы саразын ног электролитон цех æмæ бацархайын, цæмæй Электроцинк фæстæмæ кусын райдайа. Куыстуат амфамблай æрдзæн зиан нæ хаста – зæгъынц заводы раздæры кусджытæ. Митинджы архайджытæ республикæйы разамонæджы номыл бацæттæ кодтой сæрмагонд фыстæг.
