Стыр æргом аздæхтой социалон-экономикон æмæ наукон-культурон бастдзинæдтæм
Цæгат Ирыстоны сæргълæууæг Битарты Вячеслав æмæ Ираны республикæйы æххæстбарджын минæвар Мехди Санаи æрныхас кодтой дыууæвæрсыг æмгуыстадыл. Стыр æргом аздæхтой социалон-экономикон æмæ наукон-культурон бастдзинæдтæм. Республикæйы сæргълæууæг уазджытæн ракодта арфæйы ныхæстæ, æмæ загъта, Цæгат Ирыстон стыр аргъ кæй кæны Иранимæ æмгуыстадæн. Ныридæгæн дæр не хсæн ис историон æмæ культурон бастдзинæдтæ. Нæ республикæйы иу æмæ дыууæ хатты арæзт нæ уыдысты алыхуызон цымыдисаг форумтæ. Уымæй дарддæр нæ университеттæ кæнынц æнгом æмархайд. Уымæ гæсгæ нæ зæрдæ дардзыстæм, нæ иумæйаг æмгуыстад уæрæхдæр кæй кæндзæн, стæй инвестортæ дæр се ргом тынгдæр кæй здахдзысты, ууыл. Мехди Санаи дæр раарфæ кодта Битарты Вячеславæн йæ уазæгуарзондзинады тыххæй. Куыд загъта, афтæмæй нæ бастдзинæдтæ фидæны кæндзысты æнгомдæр. Уымæн ахъаз фæци, Цæгат Ирыстоны паддзахадон университеты зындгонд персайнаг поэт Фирдоусийæн бюст кæй байгом кодтой, уый дæр. Уыйхыгъд Къостайы бюст та байгом кæнынмæ хъавынц Ираны уæлдæр ахуыргæнæндæттæй иуы. Фæстаг дыууæ-æртæ азмæ наукæ æмæ культурæйы æмархайд рæзы, фæлæ ма хъæуы экономикон рæзтыл дæр кусын. Бæстондæр та – аграрон къабазмæ ргом аздахын, загъта Мехди Санаи.
