Амыдта йæ Уæрæсейы хъахъхъæнынады Министры хæдивæг, инæлар-булкъон Андрей Картаполов
Мæздæджы уыд æфсæддон-политикон куысты разамонджыты оперативон-сæрмагонд æмбырдты кæронбæттæн къæпхæн. Амыдта йæ Уæрæсейы хъахъхъæнынады Министры хæдивæг, инæлар-булкъон Андрей Картаполов. Мæздæджы æфсæддон госпиталы сæвæрдтой ахуыргæнæн пункттæ, æмæ дзы ахуыр кодтой æфсæддон-политикон иугæндты æмæ æфсæддон хæйтты цæттæдзинады мадзæлттыл. Ахуырты архайдтой 200 адæймаджы. Равдыстой æфсæддон психологты, социологты æмæ медицинон кусджыты архайд. Æфсæддон госпиталы ма æвæрд æрцыд мæскуыйаг нывгæнджыты равдыст. Се вæрæн æм бахастой Мæздæджы аивадон скъолайы æвзонг курдиæттæ. Се сфæлдыстадæн сын нæ бæстæйы хъахъхъæнынады министры хæдивæг скодта бæрзонд аргъ, æмæ сæ фæхуыдта Мæскуыйы, Грековы номыл æфсæддон нывгæнджыты студимæ. Æфсæддон æмбырдты ма сæ арæхстдзинад равдыстой Мæздæджы районы æвзонг æфсæддонтæ. Кафыдысты æмæ зарыдысты. Ахуыргæнæн мадзæлттæ фесты каджын мадзалæй. Хуыздæр политикон кусджытæ хорзæхгонд æрцыдысты майдантæй æмæ кады гæххæттытæй.
