Æрхъуыдыгонд цаумæ гæсгæ, хъæумæ бацæуæны æбæрæг фыдгæнджытæ хæцæнгарзимæ балæбурдтой фæндаггон патрулон службæйы экипажмæ
Мустыздæхы ацыдысты стыр антитеррористон ахуыртæ. Æрхъуыдыгонд цаумæ гæсгæ, хъæумæ бацæуæны æбæрæг фыдгæнджытæ хæцæнгарзимæ балæбурдтой фæндаггон патрулон службæйы экипажмæ. Пъæлицæйы иу кусæг фæци уæззау цæфтæ. Специалисттæ фыдгæнджыты дард нæ ауагътой. Æвæстиатæй бынатмæ фæдзырдтой Æдасдзинады Федералон службæйы, Уæрæсейы национ гвардийы, мидхъуыддæгты, æнæнхъæлæджы цауты æмæ æнæниздзинадхъахъхъæнынады министрадты минæвæрттæм. Фыдбылыз кæм æрцыди, уыцы район æрæхгæдтой. Хæстæгдæр хæдзæртты цæрджыты акодтой æдас бынатмæ. Фыццаг хъавыдысты террористтимæ баныхас кæнын, æмæ афтæмæй уавæр сраст кæнын. Фæлæ уый къухы нæ бафтыди. Фыдгæнджытæ сæхи равдыстой карзæй. Уæд сæрмагонд службæтæн бар лæвæрд æрцыди штурмæн. Афтæмæй, террористты къорд ахст æрцыди, уацары кæй райстой, уыдон та уæгъд скодтой. Барадхъахъхъæнæг æмæ тыхы структурæты оргæнтæй хъыгдард ничи баййæфта. Ахæм ахуыртæ республикæйы фæцæуынц арæх.
