Видеоконференцийæн разамынд лæвæрдта Уæрæсейы мидхъуыддæгты министр, пъæлицæйы инæлар Владимир Колокольцев.
Битарты Вячеслав ма архайдта наркотикты ныхмæ Паддзахадон комитеты æмбырды. Видеоконференцийæн разамынд лæвæрдта Уæрæсейы мидхъуыддæгты министр, пъæлицæйы инæлар Владимир Колокольцев. Æмбырды ма архайдта нæ республикæйы мидхъуыддæгты министр Михаил Скоков, æмæ æндæр министрадты æмæ ведомствоты разамонджытæ, медицинон кусджытæ. Стыр æргом аздæхтой наркотикты ныхмæ Паддзахадон политикæйы стратегимæ 2030-æм азмæ. Владимир Колокольцев куыд загъта, афтæмæй стратегийы нысантæ æвæргæйæ, бахынцтой бирæ хъуыддæгтæ. Бæлвырддæр та – фæстаг рæстæг наркотиктæ кæй парахат кæнынц, IT-технологитæй пайда кæнгæйæ. Хицæн ныхас цыд, афтекты куысты цы барадхæлдтытæ æрцæуынц, ууыл. Ам æргом здахынц – зондахастыл æвзæрырдæм чи ахады, ахæм медицинон препараттæм. Федералон Министры хъуыдымæ гæсгæ, афтекты наркомани кæй хонынц, уыимæ тох, раздæрау, у актуалон. Наркотикты ныхмæ къамисы куысты фæрцы бæрнон ведомствотимæ æмгуыстад кæнгæйæ бантыст, фармацевтон архайд чи кодта, ахæм 3 амалхъом адæймагæн сæ лицензи айсын. Уæрæсейы та, æмтгæй райсгæйæ, ахæм цаутæ уыд 8. Æмбырды архайджытæ æрцыдысты иу хъуыдымæ – нырыккон уавæрты кæй хъæуы профилактикон мадзæлттæ ног хуызы аразын. Зæгъæм, субъектты активонæй рæзы киберволонтерты змæлд. Архайынц дзы скъоладзаутæ, студенттæ æмæ ахуыргæнджытæ. Уыдон се ппæтæн дæр дзурынц æнæниз цардыуаджы тыххæй, стæй тох кæнынц æнæзакъон сайттимæ.
