2020-æм аз нæ бæстæйы нысангонд æрцыд Фыдыбæстæйы Стыр хæсты Уæлахизы 75 азы кадæн афæдзæй
2020-æм аз нæ бæстæйы нысангонд æрцыд Фыдыбæстæйы Стыр хæсты Уæлахизы 75 азы кадæн афæдзæй. Уымæ гæсгæ арæзт цæудзысты алыхуызон зæрдылдарæн æмæ намысджын мадзæлттæ. Уæвгæ, Цæгат Ирыстоны ныридæгæн дæр райдыдтой. Хæствæллад хистæртæн æмæ кадджын ветерантæн зæрдиаг арфæтæ ракодтой Дзæуджыхъæуы Æхсæнадон æмæ ветеранты советты минæвæрттæ. Куыд рауад сæ фембæлд, уый тыххæй радзурдзæн Фидараты Маринæ.
Пагæты Алыксандрмæ æфсадмæ фæсидтысты 1942-æм азы Владивостокмæ. Уым ацыдысты йе службæйы фыццаг азтæ. Уый фæстæ йæ арвыстой Ленинградмæ. Бирæ зындзинæдтæ федта хæсты рæстæг, фæлæ ныры онг дæр хæствæллад хистæр кæны активон цард. Рæстæгæй-рæстæгмæ архайы марафонты. Алыксандр йæхицæн самал кодта дугъæй уайынæй тренажер, æмæ дзы æппынæдзухдæр кæны тренировкæтæ.
Хæсты хъæбатырдзинæдтæй дарддæр ма Пагæты Алыксандрмæ ис æндæр раппæлинаг хъуыддæгтæ дæр. Архайдта Сочийы Олимпаг арт хæссыны эстафетæйы. Уымæй дарддæр ма йе вæрæн бахаста Дзæуджыхъæу æмæ Владивостокы хсæн æфсымæрдзинад сфидар кæныны мадзалы. Фæлæ ма йæм ис бæллиц, æмæ нырма йæ къухы нæ бафтыд.
Ныр ма уал Алыксандрæн арфæтæ ракодтой йæ райгуырæн зæххыл. Уыцы хъæппæрис разынд Дзæуджыхъæуы æхсæнадон советы æмæ горæты ветеранты советмæ. Уæлахизы 75 азы размæ сфæнд кодтой хæсты ветеранты бабæрæг кæнын, æмæ сын зæрдиаг арфæтæ ракæнын.
Бæрæгбон балæвар кодтой Архонкæйы 101-аздзыд цæрæг Александра Левченкойæн стæй æфсæддон уæларв сгарæг Лидия Коньковайæн дæр. Ацы дыууæ сылгоймаджы бирæ зындзинæдтæ федтой сæ царды.
Фидæны дæр республикæйы æхсæнадон организацитæ фæнд кæнынц ахæм акцитæ арæхдæр кæнын. Уымæн æмæ ахæм кадджын хистæртæн, хæствæллад ветерантæн æххуыс у не алкæйы ахсджиагдæр хæс.
