Проект царды куы рауадзой, уæд уый фадат ратдзæн 100 ног куысты бынаты скæнынæн хæстæгдæр хохаг хъæуты цæрджытæн
50 бынаты кæм уыдзæн, ахæм фыццаг цыппарстъалыджын фысымуат байгом уыдзæн Куырттаты комы ацы аз майы. Ныртæккæ кæронмæ фæхæццæ кæнынц аивгæнæн куыстытæ, бынат ифтонггонд цæуы æппæт æмбæлгæ техникæйæ, хъæддзаумайæ, ресторанты комплексæй. Уымæй дарддæр ма æвзарынц кусджыты дæр. Проект царды куы рауадзой, уæд уый фадат ратдзæн 100 ног куысты бынаты скæнынæн хæстæгдæр хохаг хъæуты цæрджытæн. Авдуæладзыгон комплексы ис бассейн, тренажерты зал, 5 гектары фæзуатыл та – нæзы хъæды терренкур. Ног комплексы æмæ Дзæуджыхъæуы хсæн ис 50 километры. Туристты суазæг кæныны бон уыдзæн афæдзы цыфæнды афон дæр. Уымæй дарддæр территорийы нысан кæнынц къахдзоныгътыл бырæн нырыккон трассæ скæнын. Йæ дæргъ уыдзæн 1 километр æмæ 500 метры. Пайда дзы кæндзысты австриаг кусæнгæрзтæй. Уыцы-иу рæстæг дзы къахдзоныгътыл бырынæн фадат ис 1000 адæймагæн.
