Иу бонмæ байуæрстой 7 мин маскæйы
Дзæуджыхъæуы 4 афтекы адæмæн лæвар уарынц медицинон маскæтæ. Иу бонмæ байуæрстой 7 мин маскæйы. Фæлæ сæ нысан кæнынц 21 минмæ схæццæ кæнын. Ацы куыст расидтысты, иуæй-иу афтектæ маскæты аргъ кæй фæуæлдæр кодтой, уый тыххæй.
Медицинон маскæты аргъ аразгæ у йæ хæрзхъæддзинадæй мæ йæ дизайнæй. Рæстæмбис нымадæй кæны 2 сомæй – 5 сомы онг. Уæлдай тынгдæр сæ фæагурынц фæззæджы æмæ зымæджы. Фæлæ-иу уæд сæ аргъ нæ фылдæр кодта. Ныртæккæ та цалдæр афтечы маскæтæ уæй кæнынц 10-æй 25 сомы онг. Уавæр уыцырдæм ивын райдыдта 3 къуырийы размæ. Фæстаг бонты та уæлдай тынгдæр.
Уæйгæнджытæ сын сæ аргъ фылдæр кæнынц 25% онг. Маскæтæ кæнынц Уæрæсейы æмæ Китайы. Цæгатирыстойнаг афтектæ фылдæр æмгуыстад кæнынц нæ бæстæйы куыстуæттимæ. Алы бон дæр æргътæ ивынц.
Ацы афтекы та маскæтæ нæма лхæнынц. Чи сæм ис, уыдон адæмæн уарынц лæвар. Иу бонмæ байуæрстой 7 мин маскæйы.
Специалисттæ зæгъынц, Дзæуджыхъæуы фæлхасгæнджытæ фылдæр агурынц маскæтæ, вирусы ныхмæ препараттæ та къаддæр. Æргътæм алы бон дæр йæ цæст дары æнæниздзинадхъахъхъæнынадмæ цæстдарды управлени.
Зæгъын хъæуы уый, æмæ медицинон маскæты аргъ паддзахад нæ аразы. Уымæн æмæ æнæмæнг хъæугæ препаратты хыгъдмæ нæ хауынц. Уымæй пайда кæнынц, куыд сæ аразджытæ, афтæ уæйгæнджытæ дæр. Цæгат Ирыстоны æргътæн мониторинг кæнынц æхсæнадон кусджытæ. Æппæтуæрæсеон адæмон фронты активисттæ куыд зæгъынц, афтæмæй, иннæ регионтимæ абаргæйæ, нæ республикæйы нырма фиппаинæгтæ æрхæссæн нæй.
Ныртæккæ нæ республикæ цух не ййафы медицинон маскæтæй æмæ вирусы ныхмæ препараттæй дæр. Кæд исчи бафиппайа æргъты уæлæмæ цыд, уæд йæ бон бадзурæн у комкоммæ телефоны номырæй 53-42-16, æмæ æндæр цæстдарæн службæтæм.
