Дзæуджыхъæуы фыццæгæм библиотекæйы филиалы арæзт æрцыд йæ ног чиныджы презентаци
Æрыгон поэт, фыссæг, газет «Рæстдзинад»-ы уацхæссæг Гасанты Валерий ма ацы бонты раргом кодта йæ публицистикон курдиат дæр. Дзæуджыхъæуы фыццæгæм библиотекæйы филиалы арæзт æрцыд йæ ног чиныджы презентаци. Схуыдта йæ «Æргом зæрдæйы лæвар». Æмæ æцæгæйдæр рауад чиныгкæсджытæн æхсызгон лæвары хуызæн. Презентацийы уыд нæ уацхæссæг Хæуытаты Зитæ, æмæ йын ныхасы бар.
Æстæм февралы Дзæуджыхъæуы фыццаг чиныгдоны филиалы ацыд газет «Рæстдзинад»-ы уацхæссæг, поэт Гасанты Валерийы чиныг «Æргом зæрдæйы лæвар»-ы презентаци.
Чи рбацыд, уыцы уазджытæ уыдысты журналистты цæдисы уæнгтæ, авторы хæлæрттæ, сфæлдыстадон интеллигенцийы минæвæрттæ – Хæллаты Азæ, Айларты Вероникæ, Мамсыраты Тасолтан, Агънаты Гæстæн, Тъехты Тамерлан.
Чиныджы бакæсæн ис Цæгат æмæ Хуссар Ирыстоны газетты æмæ журналты алы рæстæджы фыст зындгонд адæймæгты, сфæлдыстадон интеллигенцийы кусджыты царды тыххæй очерктæ, интервьютæ, рецензитæ.
Кæд æрыгон у Валерий, уæддæр йæ къухы бирæ фты. У журналистты Цæдисы уæнг, Колыты Аксойы номыл премийы лауреат, Абайты Васойы номыл дыууæ хатты стипендиат. Иудадзыг йæхиуыл æнæауардгæйæ, зæрдиагæй кæй кусы, йæ профессионалон дæсныйад бæрзонддæр кæныныл кæй архайы, уымæ гæсгæ хорзæхгонд æрцыд Цæгат Ирыстоны журналистты Цæдисы кады гæххæттæй.
Валерий канд дæсны журналист нæу, фæлæ ма йын бирæ æнтысы литературæйы дæр. Ацы чиныг та йын публицистикæйы у фæлварæн æмæ йын сæдæйы фыццаг фæуад.
