Хицæн ныхасы аккаг у Хæххон Дыгургом
Цæгат Ирыстонæн ис стыр хъомыс туристон къабазы. Бирæ объекттæ зонынц канд Уæрæсейы нæ, фæлæ ма дунейы æндæр рæтты дæр. Хицæн ныхасы аккаг у Хæххон Дыгургом. Туристты дисы фтауы йæ рæсугъд æрдзæй, историон æмæ культурон цыртдзæвæнтæй æмæ аланты рагон царды æвдисæнтæй. Зæгъæн ис, æмæ хивæнд æрдз ацы ран равдыста йæ миддунейы арфдæр æнкъарæнтæ.
Рагон царды æвдисæнтæ: дуртæ, мæсгуытæ, хæдзæрттæ. Се ппæт дæр арæзт сты астæуккаг æнусты. Æмæ сæ цæстыгагуыйау хъахъхъæнынц бынæттон цæрджытæ.
Комы цæрæг рæдау æфсинтæ суазæг кæнынц традицион чъиритæй æмæ æндæр национ хæринæгтæй.
Хъæуы ис, æмбал кæмæн нæй, ахæм музей. Сарæзтой йæ бынæттон цæрджытæ. Йæ кусæг Гæмæонты Виталий йæхæдæг æмбырд кодта хæхты рагон дзаумæттæ.
Музей баст у Зæдæлескы Нанаимæ. Рагон таурæгъмæ гæсгæ ацы кадджын сылгоймаг тæтæр-монголы ныббырсты рæстæг æрæмбырд кодта сывæллæтты, æмæ сæ бамбæхста хъæуы. Кæд рагон æмæ зынаргъ экспонаттæ сты, уæддæр сæм ис æвналæн. Ис, 300 азы кæуыл цæуы, ахæм бандоныл абадæн. Уæлдай дисы та туристты фтауы гæнах Фрегат. Астæуккаг æнусты арæзтад фæзынди 13-æм æнусы. Йæ историйы алыварс кæддæриддар хъуыстысты алыхуызон таурæгътæ. Арæзт у науы хуызы.
Комы сæйрагдæр бынат – кувæндон Дыгуры зæд. Ацы фæндæгтæ хорз зоны фæлтæрдджын экскурситæ аразæг Сослан.
Кувæндон ис лæгæты. Сæдæгай, чи зоны, æмæ мингай азтæм ам æрæмбырд хъæддаг галты, сагты æмæ дзæбидырты бирæ сыкъатæ æмæ стæгдартæ.
Ардæм скувынмæ æрбацæуынц æнæхъæн бинонтæй æмæ мыггæгтæй. Уæвгæ Дыгургом арæзт у цалдæр комæй. Алкæцы дæр дзы у хицæн ныхасы аккаг. Сергей Селезнев ныр цалдæр азы ацы ран скæны экскурситæ. Сергейы фидарæй уырны, Хæххон Дыгургомæн æгæрон туристон хъомыс кæй ис. Ам аразæн ис сæдæгай маршруттæ. Се ппæты дæр дисы фтауынц æнæвнæлд æрдз, историон æмæ культурон цыртдзæвæнтæ, стæй алæмæты сыгъдæг уæлдæф
