Æлыгæй конд куклатæ, бæмбæгæй хъазæнтæ, алы темæтимæ баст аивгæнæнтæ
Ацы æрмæджы та уæ базонгæ кæндзыстæм, алы кары адæмæн дæр йæ къухвæллойæ циндзинад чи хæссы, ахæм адæймаг Светлана Стасенкоимæ. Æлыгæй конд куклатæ, бæмбæгæй хъазæнтæ, алы темæтимæ баст аивгæнæнтæ. Куклатæаразæг ацы куыст кæнын райдыдта 5 азы размæ, фæлæ ныридæгæн адæмæн йæхи базонын кодта. Алыхуызон конкурсты уæлахиздзауы куклатæ хуыздæртыл нымад æрцæуынц куыд нæ республикæйы, афтæ æндæр рæтты дæр. Касаты Наирæ сын уыди æвдисæн.
Сæ нанайæн æвзонг æххуысгæнджытæ. Викæ æмæ Никæ разæнгард кæнынц ног æрхъуыдыдзинæдтæм, фæлæ фылдæр та уарзынц, Светлана Стасенко цы куклатæ аразы, уыдонæй хъазын. Къухдæсны аив куклаты куыст кæнын райдыдта 5 азы размæ. Фæстаг афæдз та аразы бæмбæгæй конд хъазæнтæ. Ахæм фæндон райгуырд йæ зæрдæйы, æмæ йын, кæй зæгъын æй хъæуы, ис советон рæстæджыты рахæцæн.
Светлана хъазæнтæ кæны алы тематикæмæ гæсгæ. Йæ хæдзары ис æлыгæй конд алыхуызон дзаумæттæ, заз бæласы аивгæнæнтæ, аргъæутты хъайтартæ æмæ афтæ дарддæр. Фыдыбæстæйы Стыр хæсты Уæлахизы 75 азы кадæн та дзы фæзынди хæсты темæимæ баст куклатæ.
Фæстаг рæстæг бæмбæгæй конд куклатæ адæмы хсæн кæнынц парахатдæр. Светланæ у бирæ равдыстыты архайæг. Куыд зæгъы, афтæмæй адæмы зæрдæмæ фылдæр фæцæуынц ахæм æрмæгæй конд хъазæнтæ. Уæвгæ та ис бирæ техникæтæ. Алцæуылдæр дзы куклатæаразæг сахуыр ис йæхæдæг. Архайдта-иу дæсныйадæвдисæг ахуырты.
Светланæмæ кæдфæндыдæр зæрдæлхæнæнтæ вæййы йæ хæлæрттæн. Мидисимæ сувенир Светланæ аразы арæхстгай. Æвæры дзы йæ уды хъарм æмæ уарзондзинад. Алы хатт дæр æрхъуыды кæны исты ногдзинæдтæ. Уымæй та адæмы бафтауы дисы. Йæ хъайтартæ сты æцæгты хуызæн, адæймагмæ афтæ кæсы, цыма ныртæккæ сывæллæтты аргъæутты чингуытæй рахызтысты. Куклатæ аразæг йæ къухвæллойæ æрмæст сабитæн нæ, фæлæ хистæртæн дæр хæссы æгæрон циндзинад.
